Xitoyning Tayvanga bostirib kirishi “muqarrar bo‘lishi mumkin” va shuning uchun AQSHning Hind-Tinch okeani mintaqasidagi ittifoqchilari mudofaa xarajatlarini oshirishi kerak. Bu haqda AQSH mudofaa vaziri Pit Xegsetga tayanib, Financial Times xabar berdi.
Vazirning so‘zlariga ko‘ra, Xitoyning Tayvanni “bosib olishga urinishi” mintaqaning Hind-Tinch okeani va butun dunyo uchun “halokatli oqibatlarga olib keladi”. U Pekin Osiyoda gegemon bo‘lishni istashini va shunga muvofiq harakat qilayotganini aytdi. Vazir bu shoshilinch “xavotir qo‘ng‘irog‘i” bo‘lishi kerakligini ta’kidladi.
Buni go‘yo chiroyli ko‘rsatishga hech qanday asos yo‘q. Xitoydan kelayotgan tahdid — bu real va ehtimol, muqarrar bo‘lishi mumkin. Umid qilamizki, unday bo‘lmaydi, lekin shunday bo‘lishi ehtimoli juda yuqori.
Si o‘z harbiylariga 2027-yilgacha Tayvanga bostirib kirishga tayyor bo‘lishni buyurgan. Pekin buning uchun zarur bo‘lgan armiya tuzmoqda, har kuni mashg‘ulotlar o‘tkazmoqda va haqiqiy harakatlarga tayyorgarlik ko‘rmoqda, dedi vazir.
Hind-Tinch okeani mintaqasi Tramp administratsiyasi uchun ustuvor ahamiyatga ega. Pentagon rahbariga ko‘ra, AQSH o‘zini u yerdan “siqib chiqarishga” va ittifoqchilari hamda hamkorlarini “bo‘ysundirish va qo‘rqitishga” yo‘l qo‘ymaydi.
Biz urushga, urushning oldini olishga, kuch bilan tinchlikka erishishga tayyorlanyapmiz, dedi u.
Shuningdek, mudofaa vaziri AQSH Xitoy bilan ziddiyat izlamayotganini ta’kidladi. U Tramp ham, Amerika xalqi ham bu mamlakatga hurmat bilan qarashini aytdi. Pit Xegset Yevropa davlatlari ham Hind-Tinch okeani mintaqasida o‘z ishtirokini ko‘paytirishini istashini bildirdi. Bu Xitoyni tiyib turish uchun “foydali” bo‘lishini qayd etdi.
Izoh (0)