Maxsus komissiya va “O‘zgidromet” ma’lumotlariga ko‘ra, bugun, 27-iyunda Toshkent shahriga nam havo massalari kirib kelishi oldidan qisqa muddatli chang-to‘zon hodisalari kuzatilishi mumkin.
Prognozlarga ko‘ra, poytaxtda shamol tezligi 3–8 metr/sekundni tashkil etib, ayrim hududlarda 10–12 metr/sekundgacha kuchayishi ehtimoli bor. Buning oqibatida atmosfera havosida chang zarrachalari (xususan, PM10) miqdori vaqtincha ortadi.
Biroq kunning ikkinchi yarmida qisqa muddatli yomg‘ir yog‘ishi va momaqaldiroq kuzatilishi kutilmoqda. Yog‘ingarchilik hisobiga atmosfera havosi asta-sekin changdan tozalanadi.
Mutaxassislar nafas yo‘llari kasalliklari, allergiya hamda yurak-qon tomir tizimi muammolari bor fuqarolarga ehtiyot choralarini ko‘rishni tavsiya qilmoqda. Ularga zarurat bo‘lmasa uzoq vaqt ochiq havoda yurmaslik, deraza va eshiklarni yopiq saqlash hamda niqoblardan foydalanish maslahat berilgan.
Hozirda havo holati Maxsus komissiya tomonidan doimiy monitoring qilinmoqda.
