Oʻzbekistonda AQSHning Amazon kompaniyasi tomonidan yaratilgan Amazon Leo sunʼiy yoʻldosh interneti ishga tushiriladi. Bu haqda raqamli texnologiyalar vaziri Sherzod Shermatov 16-iyun kuni Toshkent xalqaro investitsiya forumi doirasida “Daryo”ga maʼlum qildi.
Vazirning aytishicha, yaqin kunlarda sunʼiy yoʻldosh internetini ulash boʻyicha kelishuvga erishilishi kutilmoqda.
“Amazon’ning Low earth orbit (Leo) interneti sifat, raqobat va baʼzi parametrlar jihatdan Starlinkʼdan oʻtib ham ketadi. Biz Amazon Leo internetini ishga tushiryapmiz. Shu hafta kelishuvni imzolaymiz. Keyin Amazon Leo terminallaridan Oʻzbekiston hududida bemalol foydalanish imkoniyati boʻladi. Uzoq, togʻli va choʻl hududlarining barchasida sifatli, yuqori tezlikda ishlaydigan mobil internetga ega boʻlasizlar”, dedi vazir.
Sherzod Shermatov Oʻzbekistonda Amazon Leo 2026-yilda ishga tushirilishi mumkinligini bildirdi.
Avvalroq iqtisodchilar Botir Qobilov va Behzod Hoshimov Oʻzbekistonda Starlink sunʼiy yoʻldosh internetini ishga tushirish kerakligini aytgandi.
