Italiyalik tajribali mutaxassis Aldo Espozito O‘zbekiston milliy terma jamoasi murabbiylar shtabiga qo‘shildi. Bu haqda O‘zbekiston futbol assotsiatsiyasi matbuot xizmati xabar berdi. Unga ko‘ra, ushbu mutaxassis terma jamoa futbolchilarining tiklanish jarayoni, jarohatlarning oldini olish hamda reabilitatsiya yo‘nalishida faoliyat olib boradi.
Ma’lumot uchun, Aldo Espozito faoliyati davomida Italiyaning “Kalyari” hamda “Yuventus” klublari va Italiya milliy terma jamoasida fizioterapevt sifatida ishlagan. Mutaxassis 5 ta Jahon chempionati va 5 ta Yevropa chempionatida ishtirok etgan bo‘lib, 2006-yilgi Jahon chempioni hisoblanadi.
Shuningdek, u FIFA Klublar o‘rtasidagi Jahon chempionati hamda UEFA Chempionlar Ligasida g‘oliblikni qo‘lga kiritgan jamoalar safida faoliyat yuritgan.
Ma’lumot uchun, O‘zbekiston milliy terma jamoasi 6–26-may kunlari Toshkentdagi Milliy futbol markazida o‘quv-mashg‘ulot yig‘inlarini o‘tkazadi. Shundan keyin jamoa Jahon chempionatida ishtirok etish uchun uchib ketadi.
