2025-yil holatiga koʻra, Oʻzbekistonda nikoh barqarorligi koeffitsiyenti 175,6 promilleni tashkil etdi. Bu har mingta nikohga oʻrtacha 175 ta ajrim toʻgʻri kelishini anglatadi.
Oila va gender ilmiy-tadqiqot instituti tahliliga koʻra, mazkur koʻrsatkich xalqaro miqyosda olib qaraganda past darajada hisoblanadi.
“Mamlakatda ajrimlar darajasi koʻplab davlatlarga nisbatan ancha kam. Jumladan, nikoh barqarorligi koeffitsiyenti Moldovada – 642,7, Ozarbayjonda – 431,9, Qozogʻistonda – 328,2, Qirgʻizistonda esa – 289,6 promilleni tashkil etadi. Bu raqamlar bilan solishtirganda, Oʻzbekistonda oila instituti nisbatan barqaror ekani namoyon boʻladi”, deyiladi tahlilda.
Institut hududlar boʻyicha Qashqadaryo, Xorazm va Surxondaryo viloyatlarida nikoh barqarorligi yuqori darajada saqlanib qolayotganini qayd etgan. Aksincha, Toshkent shahri, Sirdaryo va Toshkent viloyatida ajrimlar nisbatan koʻpligi kuzatilmoqda.
Statitistika qoʻmitasi maʼlumotlariga koʻra, 2025-yilda 46,9 ming oila nikohdan ajrashgan. Bu 2024-yildagiga nisbatan 1,8 mingtaga koʻp.
