O‘zbekistonda logistikadagi uzilishlar oqibatida 2026-yil birinchi choragida qoramol importi 2 baravar kamaydi. Bu haqda prezident raisligidagi videoselektorda ma’lum qilindi.
Yig‘ilishda qayd etilishicha, muammoga tezkor yechim sifatida samolyotda olib kelinadigan har bir naslli qoramol uchun 4 million so‘mgacha subsidiya ajratish, go‘sht importida esa transport xarajatining yarmini qoplash tizimi joriy etildi. Shu bilan birga, tadbirkorlar uchun muqobil transport koridorlarini kengaytirish zarurligi ta’kidlandi.
Mas’ullarga ikkinchi chorakda 45 ming tonna, yil yakunigacha esa jami 130 ming tonna go‘sht importini ta’minlash vazifasi qo‘yildi. Qayerda yuk to‘xtab qolsa yoki to‘siqlar yuzaga kelsa, tadbirkorlar murojaatini kutmasdan, onlayn monitoring orqali muammolarni operativ hal qilish topshirildi.
Hududlarda 478 ming gektar maydonda ozuqa ekinlari ekish rejalashtirilgan bo‘lsa-da, Namangan viloyatida ozuqa yerlarining 74 foizida hali ekin ekilmagani tanqid qilindi. Shuningdek, chorvachilik salohiyati yuqori bo‘lgan Zarbdor, Qiziltepa va Pop tumanlarida silos ekish boshlanmagani, Amudaryo, G‘ijduvon, Xonqa va Bag‘dod tumanlarida ham ishlar qoniqarsiz ekani qayd etildi.
Viloyat hokimlariga mavjud qoloqliklarni bartaraf etish va ishlarni jadallashtirish topshirildi. Shu bilan birga, yana 100 ming gektar ekin yerini yangi tizim asosida auksionga chiqarish belgilandi va har bir kunning qadrli ekani ta’kidlanib, ushbu yerlarni tez fursatda auksionga chiqarib, ekin ekishni boshlash zarurligi qayd etildi.
Yig‘ilishda sanoat plantatsiyalari tashkil etayotgan tadbirkorlarga keng imtiyozlar va moliyaviy resurslar ajratilayotgani bildirildi. Viloyat hokimlariga joriy yilda kamida 5 tadan yirik sanoatlashgan meva-sabzavot plantatsiyasini namunali tashkil etish vazifasi yuklatildi.
