Statistika qoʻmitasi 2026-yil yanvar–fevral oylarida qancha hajmda sanoat mahsulotlari ishlab chiqarilganini ochiqladi. Tahlilda ayrim yoʻnalishlarda pasayish, boshqalarida oʻsish qayd etilgan.
Ikki oy davomida mamlakatda 6,9 mlrd m³ tabiiy gaz qazib olingan. Bu 2025-yil mos davriga nisbatan 7 foizga kam. Neft qazib olish ham 2,6 foizga qisqarib, 103,1 ming tonnani tashkil etgan.
Elektr energiyasi ishlab chiqarish hajmi oshgan — 15,25 mlrd kVt/soat. Bu oʻtgan yil mos davriga qaraganda 6 foizga koʻp.
Yanvar-fevralda avtomobil ishlab chiqarish 12 foizga koʻpayib, jami 64 221 donaga yetgan. Eng koʻp Cobalt (23 216 dona) ishlab chiqarilgan. Keyingi oʻrinni Damas (12 301 dona) egallagan.
Oʻz navbatida benzin ishlab chiqarish hajmi 8,5 foizga ortgan va 204,4 ming tonnani tashkil qilgan. Koʻmir qazib olish oʻtgan uch yilning yanvar-fevral oylarida oʻzgarmagan — 700 ming tonnadan.
Gaz qazib olish tendensiyalari
Oʻzbekistonda 2026-yilda 40,2 mlrd m³ tabiiy gaz qazib olish rejalashtirilgan. Bu 2025-yildagidan (41,7 mlrd m³) 1,5 mlrd m³ ga kam. Kelasi yillardagi hajmlar oshib, quyidagicha shakllanishi kutilmoqda:
- 2027-yilda — 42,9 mlrd m³;
- 2028-yilda — 44,5 mlrd m³;
- 2029-yilda — 45,5 mlrd m³;
- 2030-yilda — 48,5 mlrd m³.
