Osiyo futbol konfederatsiyasi (OFK) 2027-yilgi Osiyo Kubogi final bosqichiga qur’a tashlash marosimi qoldirilganini rasman e’lon qildi. Mazkur tadbir 2026-yilning 11-aprel kuni Saudiya Arabistoni poytaxti Ar Riyod shahrida bo‘lib o‘tishi kerak edi.
OFK rasmiy saytida berilgan bayonotga ko‘ra, ushbu qaror barcha manfaatdor tomonlarning marosimda to‘liq va xavfsiz ishtirok etishini ta’minlash maqsadida qabul qilingan. Konfederatsiya Saudiya Arabistoni tashkiliy qo‘mitasiga tayyorgarlik uchun minnatdorchilik bildirdi va a’zo assotsiatsiyalarni vaziyatni to‘g‘ri tushunishga chaqirdi.
Eslatib o‘tamiz, mintaqadagi vaziyat 28-fevral kuni AQSH va Isroilning Eronga qarshi qo‘shma harbiy operatsiyasi boshlanishi ortidan keskinlashgan edi. Eron bunga javoban AQSHning mintaqadagi harbiy bazalariga, shuningdek, Isroil, Qatar, BAA, Saudiya Arabistoni, Kuvayt va Bahrayndagi qator ob’yektlarga zarbalar berdi. Aynan mana shu harbiy to‘qnashuvlar xalqaro sport tadbirlarini reja asosida o‘tkazishga to‘sqinlik qilmoqda.
Hozircha Osiyo Kubogi—2027 qur’asi qachon o‘tkazilishi haqida aniq ma’lumot berilmagan. Musobaqaning o‘zi esa Saudiya Arabistoni maydonlarida o‘tishi rejalashtirilgan.
