Vyetnamning Xoshimin shahridan Istanbulga yoʻl olgan Turkish Airlines aviakompaniyasining TK163 reysi 13-mart kuni Samarqand xalqaro aeroportiga favqulodda qoʻndi.
Uzbekistan Airports matbuot xizmatining xabar qilishicha, Boeing 787 ekipaji bortdagi yoʻlovchilardan birining sogʻligʻi yomonlashgani sababli muqobil aerodromga yoʻl olishga qaror qildi.
Samolyot Samarqandga Toshkent vaqti bilan soat 3:40 da qoʻndi. Yurak xurujida gumon qilinayotgan 1959-yilda tugʻilgan Fransiya fuqarosi boʻlgan yoʻlovchiga tezkor tibbiy yordam koʻrsatildi. Yoʻlovchi va unga hamroh boʻlgan ikki kishi qoʻshimcha tekshiruv va davolanish uchun tibbiyot xodimlariga topshirildi.
Zarur amaliyotlar bajarilgandan soʻng, parvoz davom ettirildi. Mahalliy vaqt bilan soat 5:11 da Turkish Airlines aviakompaniyasining reysi Istanbulga joʻnab ketdi.
