Isroilning Yehud shahrida sodir bo‘lgan raketa hujumi oqibatida 62 yoshli erkak halok bo‘ldi. Bu haqda O‘zbekistonning Isroildagi elchixonasi ma’lum qildi.
Qayd etilishicha, voqea 2026-yil 9-mart kuni Yehud shahridagi qurilish maydonida yuz bergan. Tarqalgan xabarlarga aniqlik kiritgan elchixona ma’lumotiga ko‘ra, halok bo‘lgan R.G‘. O‘zbekistonda tug‘ilib voyaga yetgan, biroq 2017-yilda O‘zbekiston fuqaroligidan chiqqan.
Ma’lum qilinishicha, u so‘nggi 14 yil davomida Isroilda yashab kelgan va ushbu davlat fuqarosi hisoblangan. O‘zbekistonning Isroildagi elchixonasi marhumning oila a’zolari va yaqinlariga chuqur hamdardlik bildirdi.
Shuningdek, 11-mart holatiga ko‘ra, Isroilda bo‘lgan O‘zbekiston fuqarolari orasida jarohat olganlar haqida elchixonaga ma’lumot kelib tushmagani qayd etildi.
Elchixona Isroil hududida vaziyat keskinligicha saqlanib qolayotganini inobatga olib, ushbu mamlakatda vaqtincha mehnat faoliyatini olib borayotgan yoki doimiy yashab kelayotgan vatandoshlarni ogohlantirish signallariga jiddiy munosabatda bo‘lishga hamda xavfsizlik qoidalariga qat’iy rioya qilishga chaqirdi.
