Isroil va AQSH razvedkasi bir necha oy davomida Eron oliy rahnamosi Oyatulloh Ali Xomanaiyni kuzatgan. Bu haqda manbalarga tayanib, CNN xabar berdi.
Xomanaiyning kun tartibi — qayerda yashashi, kimlar bilan uchrashishi, qanday muloqot qilishi va hujum xavfi tug‘ilganda qayerga yashirinishini diqqat bilan kuzatilgan. Eron oliy rahnamosi bilan kamdan-kam hollarda bir joyga to‘planadigan yuqori martabali siyosiy va harbiy rahbarlar ham kuzatuvga olingan.
Xomanaiy va Eronning boshqa rahbarlari 28-fevral kuni ertalab Tehronning maxsus bir hududida uchrashishni rejalashtirgan. Bu hududda Oyatullohning idorasi, Prezident devoni va Milliy xavfsizlik boshqarmasi binolari yonma-yon joylashgan.
Isroillik manbaga ko‘ra, o‘ta ehtiyotkor oliy rahnamo (Xomanaiy) kunduz kuni o‘zini xavfsizroq his qilgan va hushyorlikni susaytirgan. Ayrim Isroil hamda AQSH rasmiylari buni “qulay imkoniyat” deb hisoblagan.
Shu sababli tunda amalga oshirilishi rejalashtirilgan hujum kunduzgi hujumga o‘zgartirilgan. Isroil armiyasi Bosh shtabi boshlig‘i Eyal Zamir harbiy havo kuchlari uchuvchilariga yo‘llagan maktubida operatsiya naqadar jiddiy ekanini ta’kidladi:
Shanba kuni tongda“Arslon na’rasi” operatsiyasi boshlanadi. Siz nishonlarga zarba berish huquqiga egasiz. Biz tarixni yaratyapmiz. Sizlarga ishonaman. Hammamizga omad tilayman, deb yozgan u.
28-fevral taxminan ertalab soat 6:00 da Isroil harbiy samolyotlari AQSH bilan muvofiqlashtirilgan keng ko‘lamli zarbalarning ilk bosqichida ushbu majmuaga o‘t ochgan.
Majmuada turli rahbarlar bo‘lgan uchta obyektga bir vaqtning o‘zida zarba berilgan. Oradan bir necha soat o‘tib, prezident Donald Tramp Xomanaiy vafot etganini e’lon qilgan.Ular yuqori aniqlikdagi o‘q-dorilar va uzoq masofaga uchuvchi raketalar bilan jihozlangan, deyiladi xabarda.
Eronning eng yuqori martabali rahbarlari, jumladan, Islom inqilobi qoʻriqchilari korpusi qoʻmondoni va mudofaa vaziri nega aynan Xomanaiy boʻlgan hududda, Tehronning qoq markazida toʻplangani noma’lum. Xomanaiyning eng yaqin maslahatchilari ham o‘sha yerda bo‘lgan.“U bizning razvedka va o‘ta murakkab kuzatuv tizimlarimizdan qochib qutula olmadi va Isroil bilan yaqindan hamkorlik qilgan holda, u yoki u bilan birga yo‘q qilingan boshqa yetakchilar hech narsa qila olmadi”, deb yozdi Tramp ijtimoiy tarmoqdagi bayonotida.
Ular orasida mudofaa vaziri Aziz Nasirzoda, Harbiy kengash rahbari admiral Ali Shamxoniy, razvedka vaziri o‘rinbosari Muhammad Shiraziy, Islom inqilobi qo‘riqchilari korpusi bosh qo‘mondoni Muhammad Pakpur hamda ushbu korpusning aerokosmik kuchlari qo‘mondoni Seyyed Majid Musaviy bor edi.
“Isroil o‘zining asosiy dushmanlari bo‘lgan barcha rahbarlarini u yoki bu tarzda muntazam ravishda kuzatib boradi. Albatta, bunday operatsiyani amalga oshirish uchun sizga qo‘shimcha aql kerak bo‘ladi va siz bir nechta elementlar va omillarni birlashtirishingiz kerak, bu juda murakkab bo‘lishi mumkin”, dedi Isroil harbiy amaldori.
