Qo‘shma Shtatlar prezidentining maxsus vakili Stiv Uitkoff va maslahatchisi Jared Kushner Isroilga borib, bosh vazir Benyamin Netanyaxu bilan uchrashuv o‘tkazishi mumkin. Bu haqda Bloomberg xabar berdi.
Agentlik xabariga ko‘ra, muzokaralar urushdan keyingi G‘azoni boshqarish uchun tuzilgan “Tinchlik kengashi” o‘z faoliyatini boshlayotgan, shuningdek, Eron atrofidagi keskinlik kuchayib borayotgan bir paytga to‘g‘ri keladi. Isroil matbuot kotibi Shosh Bedrosian uchrashuv rejalashtirilganini tasdiqladi, biroq uning vaqti haqida ma’lumot bermadi. Qo‘shma Shtatlarning Quddusdagi elchixonasi esa vaziyatga izoh berishdan bosh tortdi.
Shu bilan bir vaqtda, Reuters agentligi tomonlar o‘rtasidagi uchrashuv allaqachon bo‘lib o‘tgani haqida xabar berdi. Ma’lum qilinishicha, kun tartibidagi asosiy masala G‘azo taqdiri bo‘lgan. AQSH mulozimlari Benyamin Netanyaxu bilan Donald Tramp vositachiligida erishilgan o‘t ochishni to‘xtatish bo‘yicha kelishuvning keyingi bosqichlarini muhokama qilgan.
Yangi G‘azo
Joriy yilning 22-yanvar kuni AQSH “Yangi G‘azo” loyihasini e’lon qildi. Rejaga ko‘ra, anklav infratuzilmasi butunlay qayta quriladi. Turar joy binolari, savdo va xizmat ko‘rsatish obyektlari, biznes markazlari va dengiz bo‘yidagi dam olish maskanlari barpo etiladi. Vashington mazkur tashabbusni urushdan keyingi barqarorlashtirish strategiyasining bir qismi sifatida taqdim etmoqda.
Trampning “Tinchlik kengashi”
“Yangi G‘azo” loyihasi e’lon qilingan kunda AQSH prezidentining yana bir muhim tashabbusi hayotga ko‘chdi. Donald Tramp Davosda bo‘lib o‘tgan Jahon iqtisodiy forumida so‘zga chiqib, “Tinchlik kengashi” tuzilganini e’lon qildi. Ushbu tuzilma tarkibiga kirgan jami 19 ta davlat ichida O‘zbekiston ham bor.
