Ispaniyaning “Real Madrid” klubi darvozaboni Andrey Lunin mavsum yakunida ko‘proq o‘yin amaliyotiga ega bo‘lish maqsadida “Qirollik klubi”ni tark etish bo‘yicha yakuniy qarorga kelgan. 26 yoshli futbolchiga “Chelsi” rahbariyati qiziqish bildirmoqda va Madrid klubiga dastlabki taklif ham yuborilgan. Bu haqda El Nacional nashri xabar berdi.
Manbaga ko‘ra, London klubi rasmiylari hozirgi darvozabonlarining saviyasiga shubha bilan qaramoqda. Lunin “aristokratlar” safiga o‘tishga rozi bo‘lgan va allaqachon Angliya poytaxtiga ko‘chib o‘tishga e’tiborini qaratgan.
Joriy mavsumda Lunin barcha musobaqalar doirasida 3 ta uchrashuvda ishtirok etib, 8 ta gol o‘tkazib yuborgan. Futbolchining klub bilan amaldagi shartnomasi 2030-yil yozigacha mo‘ljallangan. Transfermarkt portalidagi ma’lumotlarga ko‘ra, futbolchining bozor qiymati 15 million yevroni tashkil etadi.
Ukrainalik posbon “Real” safida UEFA Chempionlar Ligasi (2 marta), La Liga (2 marta), UEFA Superkubogi (2 marta), klublar o‘rtasidagi Jahon chempionati (1 marta), Ispaniya Kubogi (1 marta) va Ispaniya Superkubogida (2 marta) g‘olib bo‘lgan. Lunin Madrid klubi safidagi faoliyati davomida 65 ta uchrashuvda maydonga tushib, 78 ta gol o‘tkazib yuborgan va 22 ta bahsda darvozasi dahlsizligini saqlab qolgan.
