Surxondaryo viloyati Denov tumanida tanishini haqoratlab, mushtlashgan ayol sud qilindi. Bu haqda “Ovoza” ko‘rsatuvida xabar berildi.
31 yoshli ayol avval ham bir necha bor sudlangan bo‘lishiga qaramay, bu safar ham tanishi bilan yuzaga kelgan shaxsiy kelishmovchilikni mushtlashuv bilan yakunlagan. Mojaro davomida u haqoratli so‘zlar ishlatib, jabrlanuvchiga bir necha marotaba tan jarohati yetkazgan.
Voqea shu bilan yakunlanmagan. Xuddi shu kuni Denov tumani shoshilinch tez tibbiy yordam bo‘limining ma’muriy binosida ham bezorilik holati qayd etilgan. Ayol tibbiy ko‘rik uchun navbatda turgan, o‘ziga tanish bo‘lgan shaxs bilan yana janjallashgan. Mojaro vaqtida jabrlanuvchining bilagida taqilgan, qiymati 24 million so‘m deb baholangan ayollar tilla qo‘l zanjiri ochiqdan-ochiq talon-toroj qilinib, gumonlanuvchi voqea joyidan yashiringan.
Holat yuzasidan ayol qamoqqa olingan. Sud majlisida ayblanuvchining qilgan ishidan pushaymonligi, shuningdek, yetkazilgan moddiy zarar to‘liq qoplangani inobatga olingan.
Mazkur ish sudlanuvchi va uning himoyachisi tomonidan berilgan kassatsiya tartibidagi shikoyat asosida Surxondaryo viloyat sudi jinoyat ishlari bo‘yicha sudlov hay’ati tomonidan kassatsiya instansiyasida ko‘rib chiqildi. Sudlanuvchiga ikki yil sakkiz oy olti kun ozodlikdan cheklash jazosi qoldirildi.
Ajrimga asosan, sudlanuvchiga nisbatan qo‘llanilgan qamoqqa olish ehtiyot chorasi bekor qilinib, u sud zalidan ozod etildi.
