AQSHning Kaliforniya shtatiga yopirilgan kuchli yomg‘ir va bo‘ron suv toshqini hamda ko‘chkini keltirib chiqardi. Rojdestvo oqshomi, 25-dekabrga kelib, tabiiy ofat qurbonlari soni uch kishiga yetdi. Bu haqda BBC xabar berdi.
Shtatning Los-Anjeles okrugidagi ayrim hududlarida 26-dekabr kuni 27 santimetrgacha yog‘ingarchilik kuzatildi. Bu esa aholini evakuatsiya qilishga va yirik avtomobil yo‘llarining yopilishiga sabab bo‘ldi. 25-dekabr kuni oqshomidagi ma’lumotlarga ko‘ra, shtat bo‘ylab qariyb 100 ming kishi elektr ta’minotisiz qolgan.
Qutqaruvchilar suv sathi ko‘tarilishi oqibatida avtomobillarda qolib ketgan o‘nlab odamlarni qutqarish bo‘yicha operatsiyalar o‘tkazmoqda. AQSH Ob-havo bashorat qilish markazi ko‘plab hududlarda kuchli suv toshqini ehtimoli borligidan, soylar toshib, yirik daryolardagi suv sathiga ta’sir qilishi mumkinligidan ogohlantirmoqda.
Hozircha ofat oqibatida uch kishining o‘limi tasdiqlangan:
- San-Diyego okrugida 24-dekabr kuni daraxt qulashi oqibatida 64 yoshli erkak halok bo‘lgan;
- Redding shahrida 74 yoshli erkak avtomobil ichida suv toshqini qurboni bo‘lgan. Politsiya uni qutqarishga uringan bo‘lsa-da, bunga ulgurmagan;
- Mendosino okrugidagi MakKerrixer bog‘ida 70 yoshli ayolni ulkan to‘lqin qoyadan okeanga oqizib ketgan va u vafot etgan.
“Barcha Los-Anjeles aholisidan xavfsizlik choralariga rioya qilishni va yo‘lga chiqish o‘ta zarur bo‘lsa, nihoyatda ehtiyot bo‘lishni so‘rayman. Iltimos, bu bo‘ronga bepisand qaramang”, dedi mer o‘z bayonotida.
