Marokashda kuzatilayotgan kuchli yomg‘ir va u sabab bo‘lgan toshqin oqibatida halok bo‘lganlar soni 37 kishiga yetdi. Bu haqda Al Arabiya xabar berdi.
Odatda qurg‘oqchilikdan aziyat chekadigan Marokashda kuchli yomg‘ir oqibatida Safi shahriga katta talafot yetdi. Bu holat so‘nggi o‘n yil ichida yuz bergan bunday turdagi eng halokatli ofat ekani aytilmoqda. Poytaxt Rabotdan taxminan 300 kilometr janubda joylashgan Safi ko‘chalarida loyqa suv mashinalar va chiqindi qutilarini oqizib ketmoqda.
“Men barcha kiyimlarimni yo‘qotdim. Qo‘shnim menga o‘ranish uchun bir qancha kiyim berdi. Hech narsam qolmadi. Hamma narsamdan ayrildim”, dedi jabrlanuvchilardan biri.
Tarixiy shahar markazidagi kamida 70 ta uy va korxona suv ostida qoldi. 55 yoshli do‘kon egasi Abdelkader Mezraoui chakana savdo iqtisodiyoti vayron bo‘lganini aytmoqda.
“Zargarlik do‘konlari egalari barcha mollaridan ayrildi. Kiyim-kechak do‘konlari egalarida ham xuddi shunday holat”, deya u korxonalarni qutqarish uchun rasmiy kompensatsiya berishga chaqirdi.
Marokash ketma-ket yettinchi yil qattiq qurg‘oqchilik bilan kurashmoqda. Mamlakatda 2024-yili shu paytgacha qayd etilgan eng issiq yil bo‘lgan. Iqlim o‘zgarishi Shimoliy Afrika davlatida bo‘ronlarni kuchaytirib yuborgan, chunki iliq atmosfera ko‘proq namlikni ushlab turadi va iliq dengizlar ob-havodan keskin o‘zgarishlarga sabab bo‘ladi. Marokashda 1995-yilda ham toshqin sodir bo‘lib, yuzlab odamlarni, 2002-yilda esa o‘nlab odamlarni hayotdan olib ketgan.
