“Manchester Siti” hujumchisi Erling Holand Angliya Premyer ligasida yuqori samaradorlik ko‘rsatmoqda. Norvegiyalik futbolchi turnir doirasida urilgan gollar soni bo‘yicha Krishtianu Ronalduni ortda qoldirdi va endi Alan Shirerga tegishli “abadiy” rekord sari bormoqda.
APLning 17-turi doirasida “Vest Hem”ga qarshi uchrashuvda (3:0) Holand dubl muallifiga aylandi. Ushbu natija orqali u Angliya Premyer ligasidagi o‘yinlari sonini 114 taga, kiritgan gollari miqdorini esa 104 taga yetkazdi.
Mazkur ko‘rsatkich Holandga Angliya Premyer ligasi tarixidagi eng mashhur hujumchilardan biri — Krishtianu Ronalduni ortda qoldirish imkonini berdi. E’tiborlisi, norvegiyalik futbolchi bu marraga portugaliyalik yulduzga nisbatan 140 ta o‘yin kamroq o‘tkazgan holda yetib keldi.
Statistikaga nazar tashlansa, Holandning ustunligi yanada yaqqol ko‘zga tashlanadi. U Angliya Premyer ligasida har bir o‘yinda o‘rtacha 0,9 tadan gol urmoqda — bu liga tarixidagi eng yuqori ko‘rsatkich hisoblanadi. Taqqoslash uchun, Tyerri Anri ushbu reytingda 0,68, Alan Shirer esa 0,59 ko‘rsatkich bilan qayd etilgan. Krishtianu Ronaldu esa Angliya Premyer ligasida o‘rtacha 0,44 gol bilan cheklangan.
Biroq ushbu raqamlarni baholashda muhim kontekstni ham inobatga olish lozim. Krishtianu Ronaldu “Manchester Yunayted” safida asosan chap qanot vingeri sifatida harakat qilgan. Holand esa sof markaziy hujumchi bo‘lib, Xosep Gvardiola jamoasida asosiy gol yukini o‘z zimmasiga olgan. Ronaldu davridagi “Manchester Yunayted”da gollar Krishtianu, Ueyn Runi, Karlos Teves, Nani va boshqa hujumchilarga nisbatan teng taqsimlangan edi.
Joriy mavsumda Holandning samaradorligi yanada oshdi. U 17 uchrashuvda 19 ta gol urib, har o‘yinda bittadan ko‘proq gol kiritish sur’atini ushlab turibdi. E’tiborlisi, ushbu gollarning atigi bittasi penaltidan kiritilgan. Bu holat norvegiyalik hujumchining “oson” vaziyatlarsiz ham yuqori saviyada o‘ynayotganini yaqqol ko‘rsatadi.
Holand Angliya Premyer ligasida allaqachon ikki bor — 2022/2023 va 2023/2024-yilgi mavsumlarda “Oltin butsa” sovrini sohibiga aylangan. 2022/2023-yilgi mavsumda esa u 36 ta gol urib, bir mavsumdagi eng yuqori natija bo‘yicha chempionat rekordini o‘rnatgan edi. Agar hozirgi temp saqlanib qolsa, ushbu ko‘rsatkich ham yangilanishi mumkin.
Eng muhim savol esa Alan Shirer rekordiga borib taqaladi. Angliya Premyer ligasi tarixidagi eng sermahsul futbolchi bo‘lgan Shirer hozircha Holanddan 156 ta gol oldinda. Biroq angliyalik afsona buni norvegiyalik hujumchiga nisbatan 327 ta o‘yin ko‘proq maydonga tushgan holda amalga oshirgan. Holand esa chempionatda endigina to‘rtinchi mavsumini o‘tkazmoqda va u hozir bor-yo‘g‘i 25 yoshda.
Agar Erling Holand hozirgi 0,9 gol atrofidagi o‘rtacha tempni saqlab qolsa, u 2029/2030-yilgi mavsum yakuniga borib Alan Shirer rekordini yangilashi mumkin. O‘sha paytda norvegiyalik hujumchi 29 yoshda bo‘ladi. Bu esa nafaqat rekordni yangilash, balki uni uzoq yillar davomida “qo‘l yetmas” darajaga olib chiqish ehtimolini ham oshiradi.
Qizig‘i shundaki, Holand nafaqat klub miqyosida, balki terma jamoalar darajasida ham Krishtianu Ronalduning rekordlari sari yaqinlashmoqda. Ronaldu Portugaliya terma jamoasi safida 143 ta gol urgan bo‘lsa, Erling Holand Norvegiya terma jamoasi safida hozircha 55 ta gol muallifi hisoblanadi. Ammo uning hozirgi sur’ati bu ko‘rsatkichga ham jiddiy xavf solmoqda.
Bir so‘z bilan aytganda, Angliya Premyer ligasi yangi tarixiy bosqichga qadam qo‘ymoqda va ushbu davrning markazida Erling Holand turibdi. Hozircha esa norvegiyalik “gol mashinasini” to‘xtata oladigan kuch ko‘rinmayapti.
Shuningdek, Transfermarkt portali tomonidan yangilangan transfer qiymatlari reytingida eng qimmat futbolchilar sifatida Kilian Mbappe (“Real Madrid”), Lamin Yamal (“Barselona”) va “Manchester Siti” hujumchisi Erling Holand qayd etilgan. Ushbu futbolchilarning transfer bahosi 200 million yevroga teng.
Holand yetakchiligidagi Norvegiya terma jamoasi 8 uchrashuvda 24 ochko jamg‘arib, Jahon chempionati Yevropa saralash bosqichining “I” guruhida birinchi o‘rinni egalladi va 1998-yildan buyon ilk bor mundial yo‘llanmasini qo‘lga kiritdi.
Ma’lumot uchun, ayni paytda “shaharliklar” Angliya Premyer ligasi turnir jadvalida 37 ochko bilan ikkinchi o‘rinni egallab turibdi va peshqadam “Arsenal”dan ikki ochkoga ortda qolmoqda.
