Birlashgan Arab Amirliklarining Dubay shahrida erkaklar o‘rtasida boks bo‘yicha Jahon chempionati yakunlandi. Xalqaro boks assotsiatsiyasi (IBA) tomonidan tashkil etilgan nufuzli musobaqada O‘zbekiston terma jamoasi safida 13 nafar bokschi ishtirok etib, 2 ta oltin, 4 ta kumush hamda 3 ta bronza medalini qo‘lga kiritdi.
−51 kg vazn toifasida ishtirok etib, faoliyatida ikkinchi bor Jahon chempionligini qo‘lga kiritgan Hasanboy Do‘stmatov musobaqaning eng yaxshi bokschisi, deb topildi.
Do‘smatov bunga qadar 2023-yilda Toshkent shahrida o‘tkazilgan IBA Jahon chempionati hamda 2016-yilgi Rio Olimpiadasida ham “Eng yaxshi bokschi” sovriniga loyiq ko‘rilgan edi.
Kecha, 14-dekabr kuni bo‘lib o‘tgan final janglarida Hasanboy Do‘stmatov (−51 kg) hamda Asadxo‘ja Mo‘ydinxo‘jayev (−67 kg) g‘alaba qozonib, oltin medallarni qo‘lga kiritdi. Abdumalik Halokov (−60 kg), Javohir Ummataliyev (−80 kg), Arman Maxanov (+92 kg) hamda To‘rabek Xabibullayev (−92 kg) kumush medalga ega chiqdi. Shuningdek, Fazliddin Erkinboyev (−75 kg), Asilbek Jalilov (−54 kg) hamda Xo‘janazar Nortojiyev (−57 kg) O‘zbekiston terma jamoasi hisobiga bronza medallarini qo‘shib qo‘ydi.
Musobaqada eng ko‘p medal rossiyalik bokschilar tomonidan qo‘lga kiritildi. Ular 7 ta oltin, 5 ta kumush va 1 ta bronza medal bilan umumjamoa reytingida birinchi o‘rinni egalladi. 3 ta oltin, 1 ta kumush hamda 2 ta bronza medalni qo‘lga kiritgan Qozog‘iston terma jamoasi ikkinchi pog‘onadan joy oldi. O‘zbekiston terma jamoasi esa kuchli uchlikni yakunladi.
