Birlashgan Arab Amirliklarining Dubay shahrida erkaklar o‘rtasida boks bo‘yicha Jahon chempionati davom etmoqda. Xalqaro boks assotsiatsiyasi (IBA) tomonidan tashkil etilgan ushbu nufuzli musobaqaning navbatdagi kunida O‘zbekiston terma jamoasining 4 nafar a’zosi ringga ko‘tarildi va ularning barchasi navbatdagi bosqichga yo‘l oldi.
Dastlab ringga chiqqan Asadxo‘ja Mo‘ydinxo‘jayev -54 kg vazn toifasidagi bahsda ganalik Amadu Muhammadga hech qanday imkoniyat qoldirmadi — 5:0.
-86 kg vaznda bo‘lib o‘tgan bahsda, Akmaljon Isroilov qozog‘istonlik Daulet Tulemissovustidan to‘liq ustunlikka erishib, jangni 5:0 hisobida o‘z foydasiga yakunladi. Israoilov jang davomida raqibini ikki bor nokdaunga ham tushirdi.
-51 kg vaznda bo‘lib o‘tgan bahsda, 2 karra Olimpiya o‘yinlari g‘olibi, Jahon chempioni Hasanboy Do‘smatov turkiyalik Samet Gumusni 5:0 hisobida mag‘lubiyatga uchratdi.
Shuningdek, Xo‘janazar Nortojiyev -57 kg vaznda hindistonlik Sachinni 5:0 hisobida mag‘lubiyatga uchratdi va chorak finalga yo‘l oldi.
Shu tariqa, O‘zbekiston delegatsiyasining yana 4 vakili musobaqaning chorak final bosqichiga yo‘llanmani qo‘lga kiritdi. 10-dekabr kuni o‘zbekistonlik 11 nafar bokschi yarim final yo‘llanmasi uchun ringga ko‘tariladi.
Juftliklar bilan tanishing:
- –48 kg: Shodiyorjon Meliqo‘ziyev — Subhan Mamedov (Ozarbayjon), B ring, 18:00
- –54 kg: Asilbek Jalilov — Artur Nagapetyan (Serbiya), A ring, 18:45
- –60 kg: Abdumalik Halokov — Mahammadali Ashiraliyev (Ozarbayjon), A ring, 19:00
- –67 kg: Asadxo‘ja Mo‘ydinxo‘jayev — Sanatali Toltayev (Qozog‘iston), A ring, 19:30
- –75 kg: Fazliddin Erkinboyev — Saidjamshid Jafarov (Ozarbayjon), A ring, 20:00
- –86 kg: Akmaljon Isroilov — Sharabutdin Atayev (Rossiya), A ring, 20:30
- +92 kg: Arman Maxanov — Alejandro Lopez (Kuba), A ring, 21:00
- –51 kg: Hasanboy Do‘smatov — Meroj Sufijonov (Tojikiston), A ring, 22:00
- –57 kg: Xo‘janazar Nortojiyev — Jirair Sarisyan (Armaniston), B ring, 22:30
- –80 kg: Javohir Ummataliyev — Artyom Ageyev (Serbiya), A ring, 00:15
- –92 kg: To‘rabek Habibullayev —Julio Sezar La Kruz (Kuba), A ring, 00:45
Janglar Toshkent vaqti bilan 18:00da boshlanadi. Ikkinchi dastur esa 22:00dan start oladi.
