Turkiya Superligasi 15-turidan o‘rin olgan “Bashakshehir” hamda “Fenerbahche” jamoalari o‘rtasidagi bahs yakuniga yetdi. Istanbuldagi “Fotih Terim” stadionida kechgan bahsda tomonlar 1:1 hisobida durang o‘ynadi.
Uchrashuvdagi hisob 64-daqiqada mehmonlar futbolchisi Milan Shkrinyar tomonidan ochilgan bo‘lsa, 81-daqiqada Bertug‘ Yildirim oradagi muvozanatni tikladi. O‘yinning qolgan daqiqalari ham keskin kurashlar ostida kechdi, ammo darvozalar boshqa ishg‘ol qilinmadi.
“Bashakshehir”da to‘p tepadigan O‘zbekiston terma jamoasi futbolchilari — Abbosbek Fayzullayev hamda Eldor Shomurodov uchrashuvni asosiy tarkibda boshladi. Shomurodov to‘liq o‘ynagan bo‘lsa, Fayzullayev 71-daqiqada zaxiraga olindi.
Mazkur natijadan keyin “Bashakshehir” hisobidagi ochkolar soni 17 taga yetdi. Jamoa hozirda turnir jadvalining 9-pog‘onasini egallab turibdi. 33 ochkosi bor “Fenerbahche” esa 2-o‘rindan joy olgan.
Turkiya Superligasi15-tur
6-dekabr, shanba
“Bashakshehir” — “Fenerbahche” 1:1
Gollar: 0:1 — Shkrinyar (64), 1:1 — Yildirim (81)
