Birlashgan Arab Amirliklarining Dubay shahrida boks bo‘yicha erkaklar o‘rtasida Jahon chempionati bo‘lib o‘tmoqda. Xalqaro boks assotsiatsiyasi — IBA tomonidan o‘tkazilayotgan ushbu nufuzli musobaqada bugun, 4-dekabr O‘zbekiston terma jamoasi a’zolari o‘z yurishini g‘alaba bilan boshladi.
O‘zbekistonlik charm qo‘lqop ustalari ishtirokini –80 kg vazn toifasida Javohir Ummataliyev boshlab berdi. U Seyshel Orollari vakili Dasheil Fanchettega qarshi ringga ko‘tarildi. Jang to‘liq uch raund davom etdi va Ummataliyev raqibi ustidan hakamlar qaroriga ko‘ra 5:0 hisobida g‘alaba qozondi.
Javohir Ummataliyev — World Boxing tashkiloti tomonidan o‘tkazilgan Jahon chempionatining amaldagi g‘olibi hisoblanadi. U IBA’ning kattalar reytingida hali yuqori o‘rinlarni egallamaganligi bois saralashning ilk bosqichidan o‘z ishtirokini boshladi. Keyingi bosqichda Ummataliyev 4-raqam ostida saralangan gaitilik Sedrik Beloni-Dulieprega qarshi ringga chiqadi.
Shuningdek, –63,5 kg vazn toifasida harakat qilayotgan Sayat Ilyosov ham Jahon chempionatini g‘alaba bilan boshladi. U ilk bosqichda falastinlik Anas Sulaymonga qarshi bahs olib bordi va muddatidan avval g‘alabaga erishdi. Jang davomida Ilyosov raqibini nokdaun holatiga tushirishga muvaffaq bo‘ldi. Ikkinchi raunddan so‘ng falastinlik bokschi jangni davom ettira olmasligi ma’lum bo‘ldi va o‘zbekistonlik bokschi g‘alabani rasmiylashtirdi.
Ilyosovning keyingi bosqichdagi raqibi Qirg‘iz Respublikasi vakili Umar Livaza bo‘ladi.
