Guliston shahar “Taraqqiyot” MFYda joylashgan bozordagi ovqatlanish shoxobchasida gaz portlab yong‘in kelib chiqdi. Holat aks etgan video ijtimoiy tarmoqlarda tarqaldi.
Sirdaryo viloyati FVB matbuot xizmati holatni tasdiqladi. Ma’lum qilinishicha, 2-dekabr kuni soat 10:49 da ovqatlanish shoxobchasining oshxonasida yong‘in sodir bo‘lgani to‘g‘risida FVBga xabar kelib tushgan. Ko‘rilgan tezkor choralar natijasida yong‘in to‘liq bartaraf etilgan. Hodisa bo‘yicha qo‘shimcha ma’lumot berilishi bildirilgan.
Sirdaryo viloyati Sogʻliqni saqlash boshqarmasi axborotiga ko‘ra, hodisa oqibatida tan jarohati olgan fuqarolarga zarur tibbiy yordam ko‘rsatish maqsadida ular Respublika shoshilinch tibbiy yordam ilmiy markazi Sirdaryo viloyat filialiga yetkazilgan. Vafot etganlar yo‘q.
