2025-yil 17–23-noyabr kunlari Afgʻonistonning Kobul shahrida “Imom Abu Hanifa” IV xalqaro koʻrgazmasi va savdo yarmarkasi oʻtkaziladi. Unda Made in Uzbekistan milliy stendi bilan 90 nafar oʻzbekistonlik tadbirkor ishtirok etadi.
Savdo-sanoat palatasi xabariga koʻra, ayni paytda delegatsiya aʼzolari Kobulga yetib borgan.
“Koʻrgazmada ishtirok etishdan asosiy maqsad — qishloq xoʻjaligi, konchilik, energetika, taʼlim, qurilish, avtomobilsozlik, sogʻliqni saqlash, turizm, toʻqimachilik va boshqa qator yoʻnalishlarda faoliyat yuritayotgan mahalliy ishlab chiqaruvchilar mahsulotlarini namoyish etishdan iborat. Koʻrgazmada 5 mingdan ortiq kompaniyalar, Eron, Qirgʻiziston, Hindistondan kelgan tadbirkorlar ishtirok etishi kutilmoqda”, deyiladi palata xabarida.
Maʼlum qilinishicha, tadbir doirasida B2B uchrashuvlar tashkil etiladi. Bu ishtirokchilarga toʻgʻridan toʻgʻri biznes muzokaralar olib borish, yangi sheriklar topish va hamkorlikni yoʻlga qoʻyish imkonini beradi.
Avvalroq palata Surxondaryo viloyati va Afgʻonistonning Balx viloyati oʻrtasida hamkorlik boʻyicha ishchi komissiya yigʻilishi oʻtkazilgani xabar qilgandi. Uchrashuv doirasida eksport faoliyatiga oid tashkilotlar rahbarlari, tadbirkorlar ishtirokida ochiq muloqot hamda ishbilarmon doiralar oʻrtasida B2B formatida muzokaralar oʻtkazilgan.
Delegatsiya aʼzolari Termiz xalqaro savdo markazining faoliyati, mavjud imkoniyatlar hamda Afgʻonistondan olib kelinayotgan mahsulotlar koʻrgazmasi bilan tanishgan.
Muzokaralar yakunida Surxondaryo viloyati Savdo-sanoat palatasi va Afgʻoniston Savdo-sanoat palatasi oʻrtasida hamkorlik toʻgʻrisidagi memorandum imzolangan.
