Londonning “Chelsi” klubi hujumchisi Rahim Sterlingning uyi talon-toroj qilindi. Hodisa 8-noyabr, shanba kuni soat taxminan 18:30 atrofida yuz bergan. Bu haqda The Telegraph nashri xabar berdi.
Manbaga ko‘ra, bu paytda futbolchi oilasi bilan uyda bo‘lgan va hech kim jarohat olmagan. Niqobli shaxslar Rahimning uyiga kirishga uringan, biroq hodisaning qolgan tafsilotlari hozircha aniq emas. Shuningdek, gumonlanuvchilarning shaxsi aniqlangan, biroq ular allaqachon mamlakatdan chiqib ketgan, deya xabar beradi Daily Mail nashri.
“Biz tasdiqlay olamizki, Rahim Sterlingning uyi hafta oxirida talon-torojga uchradi. Hodisa paytida u va bolalari uyda bo‘lgan. Biz shukr qilamizki, Sterling va uning yaqinlari xavfsiz. Shu murakkab pallada ularning shaxsiy hayotiga hurmat bilan yondashilishini so‘raymiz”, deydi futbolchining vakili
Sterlingning uyiga o‘gri tushish holati ilk marta kuzatilmayapti. 2022-yilda ham bu kabi holat sodir bo‘lgan, o‘sha paytda uyning ichida hech kim bo‘lmagan. Hodisa sabab Sterling Qatardagi Jahon chempionati 1/8 final bosqichi doirasidagi Senegalga uchrashuvini (3:0) o‘tkazib yuborgan.
Ma’lumot uchun, 30 yoshli Rahim Sterling bunga qadar “Liverpul”, “Manchester Siti” va “Arsenal” klublari sharafini himoya qilgan ham to‘p surgan.
