O‘zbekiston Jahon savdo tashkilotiga a’zo bo‘lish bo‘yicha yana ikki mamlakat — Kanada va Panama bilan muzokaralarni yakunladi. Bu haqda prezidentning JST bo‘yicha maxsus vakili Azizbek Urunov ma’lum qildi.
“O‘zbekistonning JSTga a’zo bo‘lishi bo‘yicha ishchi guruhning 11-yig‘ilishida O‘zbekiston Kanada va Panama bilan tashkilotga kirish bo‘yicha ikki tomonlama muzokaralarni yakunlovchi protokollarni muvaffaqiyatli imzoladi”, deb yozdi u LinkedIn’da.
Uning izohda ma’lum qilishicha, ushbu tashkilotga to‘laqonli a’zo bo‘lish uchun yana uchta mamlakat bilan kelishuvga erishish qoldi.
19-sentyabrda O‘zbekiston JSTga a’zo bo‘lish yo‘lida uchta davlat — Argentina, Avstraliya va Gonduras bilan ikki tomonlama protokollarni imzolagandi.
Oʻzbekistonning JSTga aʼzo boʻlish harakatlari
Bu 1994-yildan boshlangan. 1998-yilda jarayonni amalga oshirish boʻyicha maxsus ishchi guruh tuzilgan. Lekin nomaʼlum sabablarga koʻra aʼzolik ishlari sust kechgan. 2005-yil oʻrtalariga kelib, xalqaro ekspertlar bilan uchrashuvlar toʻxtab qolgan. 2020-yil iyul oyida jarayon yana jonlanib, ishchi guruhning toʻrtinchi yigʻilishi oʻtkazilgan. Keyin 2022-yil iyun, 2023-yil mart va 2023-yil noyabr oylarida uchrashuvlar boʻlib oʻtgan.
O‘zbekiston 2026-yilgacha Jahon savdo tashkilotiga aʼzo bo‘lmoqchi. Davlat rahbarining alohida nazorati asosida 2023-yildan boshlab ushbu tashkilotga aʼzo bo‘lish choralari ko‘rilmoqda. 2025-yil may oyida o‘tkazgan yig‘ilishda O‘zbekistonning JSTga aʼzo bo‘lish jarayonini jadallashtirish bo‘yicha topshiriq bergandi. Shavkat Mirziyoyev O‘zbekistonning ushbu tashkilotga a’zo bo‘lishi chuqur o‘ylangan va uzoqni ko‘zlagan tanlov ekanligini ta’kidlagandi.
