Prezidentning 2026–2030-yillarda kam uchraydigan (orfan) va boshqa irsiy-genetik kasalliklarga chalingan bolalarga tibbiy va ijtimoiy yordam koʻrsatishga qaratilgan qarori qabul qilindi. Bu haqda Adliya vazirligi xabar qildi.
Qayd etilishicha, davlat byudjetidan bepul davolanadigan orfan va boshqa irsiy-genetik kasalliklar turini 5 tadan 10 taga yetkaziladi, shuningdek, ularga chalingan bolalarni dorilar, maxsus ovqat va kerakli tibbiy jihozlar bilan taʼminlash darajasini 95 foizdan 99 foizgacha oshiriladi.
2026-yil 1-yanvardan shunday xastaliklarga chalingan 18 yoshdan 21 yoshgacha boʻlgan bemorlar bepul tibbiy kuzatuvda boʻladi va davolanish ishlari davom ettiriladi.
Avvalroq 5 turdagi kamyob kasalliklarga chalingan jami 2 174 nafar bola byudjetdan taʼminlanayotgani, shuningdek, shu yoʻnalishga 2026—2030-yillarda jami 961 milliard soʻm mablagʻ yoʻnaltirish koʻzda tutilgani xabar qilingandi.
