Maktab direktorlari va ularning oʻrinbosarlariga endilikda faoliyat samaradorligi koʻrsatkichlari (KPI) asosida oylik ustamalar toʻlanadi.
Qayd etilishicha, umumtaʼlim muassasalarining direktori va uning oʻrinbosarlari faoliyatining samaradorligi maktabning tegishli koʻrsatkichlariga muvofiq 100 ballik tizimda baholanadi. Ularga bazaviy tarif stavkalariga nisbatan 20 foiz har oylik ustamalar toʻlanadi.
Bunda akademik, noakademik, tarbiyaviy ishlar va moliyaviy faoliyat samaradorligi hamda malakali oʻqituvchilar bilan taʼminlanganlik darajasi natijalariga qaraladi. Koʻrsatkichlar baholash metodikasi va tartibi Maktabgacha va maktab taʼlimi vazirligi tomonidan tasdiqlanadi.
Bundan tashqari, oʻz faoliyatida ijobiy natija koʻrsatgan jismoniy tarbiya fani oʻqituvchilari bazaviy tarif stavkalariga nisbatan 20 foizgacha ragʻbatlantiriladi, shuningdek, umumtaʼlim muassasalarida tashkil etilgan “Zakovat” intellektual klublarining koordinatori boʻlgan oʻqituvchilarga ularning tarif stavkasining 50 foizi miqdorida bir martalik toʻlov toʻlanadi.
Avvalroq musiqa va jismoniy tarbiya oʻqituvchilariga sertifikat berish tartibi tasdiqlangandi.
