Angliyaning Liverpul shahrida boks bo‘yicha kattalar o‘rtasidagi Jahon chempionati davom etmoqda. 6-sentabr, shanba kuni O‘zbekiston terma jamoasining 5 nafar bokschisi ringga chiqib, ularning barchasi g‘alaba qozondi.
Kunning ilk bahsida -51 kg vazn toifasida ringga chiqqan Feruza Kazakova panamalik raqibi Juletta Hinestrrosani 5:0 hisobida mag‘lubiyatga uchratib, keyingi bosqichga yo‘l oldi. U navbatdagi jangini 9-sentabr kuni o‘tkazadi.
Shuningdek, -70 kg vazn toifasida Shavkatjon Boltayev Shvetsiya vakili Kevin Skott ustidan 3:2 hisobida g‘alaba qozonib, musobaqaning keyingi bosqichiga yo‘l oldi. Uning navbatdagi jang sanasi — 8-sentabr.
Sitora Turdibekova ham musobaqani ishonchli tarzda boshladi. U Ukraina vakilasi Tatyana Dovhalni 4:1 hisobida mag‘lub etdi.
Kunning yakuniga qadar yana ikki nafar o‘zbekistonlik sportchi ringga chiqdi. +80 kg vazn toifasida Oltinoy Sotimboyeva ukrainalik Mariya Lovchinskani 5:0 hisobida qiyinchiliksiz mag‘lub etdi. Oltinoy navbatdagi jangini 10-sentabr kuni Hindiston vakilasi Nupurga qarshi o‘tkazadi.
Shuningdek, Olimpiya va jahon chempioni Abdumalik Halokov -60 kg vazn toifasida turkiyalik Mehmethan Chinarga qarshi bahs olib borib, raqibini katta ustunlik bilan 5:0 hisobida mag‘lub etdi. Abdumalikning navbatdagi jangi 8-sentabr kuni bo‘lib o‘tadi.Musobaqaning 4-kunida yana 5 nafar o‘zbekistonlik bokschi ringga chiqishi kutilmoqda.
Juftliklar bilan tanishing:
-55 kg: Mirazizbek Mirzahalilov — Pavan Bartval (Hindiston) 16:00;-80 kg: Javohir Ummataliyev — Nikodem Kozak (Polsha) 17:45;
-57 kg: Humorabonu Mamajonova — Boyana Goykovich (Chernogoriya) 22:30;
-70 kg: Aziza Zokirova — Regina Lakos (Vengriya) 23:30;
-65 kg: Asadxo‘ja Mo‘ydinxo‘jaev — Jianxao Ju (Xitoy) 01:45;
Eslatib o‘tamiz, musobaqaning birinchi dasturi O‘zbekiston vaqti bilan soat 15:00, kechki dastur esa 22:00 da boshlanadi.
