Yevropa Ittifoqi kuchli zilziladan zarar ko‘rgan Afg‘onistonga 1 million yevro mablag‘ ajratgan hamda 130 tonna gumanitar yordam yubordi. Bu haqda Yevrokomissiya rasmiy veb-saytida ma’lum qilindi.
Ta`kidlanishicha, birinchi navbatdagi zarur tovarlar partiyasi hafta oxirigacha Kobulga yetib boradi. Mablag‘lar hozirda joylarda faoliyat yuritayotgan gumanitar tashkilotlarga beriladi.
Chodirlar, oziq-ovqat, dori-darmon va boshqa zarur narsalarni yetkazib berish Yevropa Ittifoqi tomonidan moliyalashtiriladigan ikkita gumanitar parvoz orqali amalga oshiriladi. Bundan tashqari, yordamni yetkazishda ko‘maklashadigan favqulodda vaziyat xaritalarini tuzish uchun Copernicus sun’iy yo‘ldosh xizmati jalb etilgan.
Ushbu yangi yordam mamlakatdagi gumanitar tashkilotlar uchun 2025-yilda ajratilgan 161 million yevrolik gumanitar yordamga qo‘shimcha hisoblanadi. Yevropa Ittifoqining insonparvarlik yordami faqat hamkor tashkilotlar orqali yuboriladi.
Afg‘onistondagi so‘nggi zilzila
31-avgust kuni yarim tunda Afg‘onistonning Jalolobod shahri yaqinida 6,0 balli zilzila sodir bo‘ldi. Zilzilada qurbonlarning aksariyati Kunar viloyatidan bo‘lgan. Undan keyin 4,5–5,2 magnitudali aftershoklar qayd etilgan. Afg‘oniston aholisi asosan paxsa devorli uylarda yashagani bois vayronagarchilik ko‘lami keng bo‘lgan. Zilzila tog‘li va olis hududda ro‘y bergani sababli aniq ma’lumotlarni yig‘ish vaqt olmoqda.
Afg‘oniston Hind va Yevrosiyo litosfera plitalari to‘qnashgan hududda joylashgani uchun seysmik xavfi yuqori bo‘lgan mamlakat hisoblanadi. Bundan tashqari, Sharqiy Afg‘onistonning tog‘li hududlari ko‘chkilarga moyil bo‘lib, bu qutqaruv ishlarini yanada murakkablashtirmoqda.
