Angliyaning “Manchester Siti” klubi “PSJ” darvozaboni Janluiji Donnarumma transferi bo‘yicha kelishuvga erishish arafasida turibdi. Football Italia jurnalisti Alfredo Pedulla xabariga ko‘ra, tomonlar o‘rtasidagi muzokaralar davom etmoqda va bitim yaqin kunlarda yakunlanishi kutilmoqda.
Donnarumma “shaharliklar” bilan bitim bo‘yicha kelishib olgan va faoliyatini Angliya Premyer Ligasi doirasida davom ettirishga rozilik bildirgan. Ammo hozircha klublar bir qarorga kelgani yo‘q. Dastlab, “PSJ” italiyalik darvozabon uchun 45–50 million yevro so‘ragan edi. Biroq klub rahbariyati futbolchi kelasi yozda erkin agent sifatida ketish ehtimolini hisobga olib, narxni 30 million yevroga tushirishga majbur bo‘lgan. “Manchester Siti” esa ushbu summani to‘lashga tayyor ekanligini ma’lum qilgan.
Avvalroq Donnarumma Turkiyaning “Galatasaroy” klubidan kelgan taklifini rad etgani va Angliya Premyer Ligasi klublaridan biriga o‘tishni ma’qul ko‘rayotgani xabar qilingandi. Italiyalik posbonga uchta ingliz klubi qiziqish bildirgan — “Manchester Yunayted”, “Manchester Siti” va “Chelsi”. Hozirda esa asosiy nomzod sifatida Pep Gvardiola boshqaruvidagi jamoa ko‘rilmoqda.
- 26 yoshli Donnarumma 2021-yil yozida “Milan”dan “PSJ”ga erkin agent sifatida o‘tgan.
- Uning parijliklar bilan shartnomasi 2026-yil yoziga qadar amal qiladi.
- Transfermarkt portali futbolchining qiymatini 40 million yevroga baholagan.
