“Pari Sen-Jermen” darvozaboni Janluiji Donnarumma va klub rahbariyati o‘rtasidagi yangi shartnoma bo‘yicha muzokaralar to‘xtab qoldi. Bu haqda Le Parisien nashri xabar berdi.
Shundan so‘ng “PSJ” Donnarummaga o‘rinbosar qidira boshladi. Xabarlarga qaraganda, parijliklar “Lill” klubi darvozaboni Lyuk Shevalye bilan shartnoma imzolash arafasida turibdi. Uning transfer narxi 40 million yevroga baholanmoqda. Klub darvozabonni 13-avgust kuni Yevropa Superkubogi doirasida bo‘ladigan “Tottenhem”ga qarshi uchrashuv oldida tarkibga qo‘shib olishni rejalashtirmoqda.
Donnarumma esa Turkiyaning “Galatasaroy” klubidan tushgan taklifni rad etgan va Angliya Premyer Ligasiga o‘tishni ma’qul ko‘rmoqda. Hozirda unda 3 ta ingliz klubi qiziqish bildirmoqda — “Manchester Yunayted”, “Manchester Siti” va “Chelsi”. Agar muzokaralar ijobiy yakunlansa, darvozabon APLga ko‘chib o‘tadi.
Ma’lumot uchun, italiyalik darvozabon 2024/25-yilgi mavsum “PSJ” safida jami 47 ta o‘yinda maydonga tushib, 43 ta gol o‘tkazib yuborgan. Transfermarkt portali uning qiymatini 40 million yevroga baholagan.
