Bir vaqtlar dunyo bo‘ylab tanilgan bokschi, millionlab dollarlar sohibi bo‘lgan Mayk Tayson hayotida ko‘plab burilishlar yuz berdi. Uning boyligi deyarli 700 million dollarga baholangan edi, biroq u hamma pullarini ko‘kka sovurdi va 2003-yilda o‘zini bankrot deb e’lon qildi.
Tayson juda ko‘p pulni hashamatli uylar, avtomobillar, yaxtalar, mototsikllar, bengal yo‘lbarslari va ularning murabbiylari, qimmatbaho taqinchoqlar hamda ziyofatlarga sarflagan. Shuningdek, uning hayotida zo‘rlash bo‘yicha sud ishi bo‘lib o‘tgan va u advokatlarga 100 million dollar atrofida to‘lagan.
2020-yilda Mayk Tayson 15 yillik tanaffusdan so‘ng ringga qaytdi. Bu orqali u yana biroz daromad topmoqchi edi. U o‘sha yili besh vazn toifasida sobiq jahon chempioni bo‘lgan Roy Jons Jr.ga qarshi ko‘rgazmali jang o‘tkazdi. Jang sakkiz raund davom etdi va durang bilan yakunlandi. Tayson bu jang uchun kafolatlangan 10 million dollar daromad oldi, yana shuncha miqdorni translyatsiya huquqlaridan topdi.
2024-yilda amerikalik bloger va bokschi Jeyk Pol bilan yana bir ko‘rgazmali jang rejalashtirilgan edi. Biroq Taysonda sog‘liq muammolari yuzaga kelgani sababli jang sanasi ko‘chirildi. Bokschilar o‘rtasida 30 yosh farq bor. Mayk Tayson esa jangda yutqazdi.
Tayson boshqa bokschilar janglarini ham tashkil qiladi. 2013-yilda u Iron Mike Promotions nomli promouterlik kompaniyasini tashkil etgan bo‘lib, u professional boks janglarini o‘tkazish bilan shug‘ullanadi.
So‘nggi yillarda Mayk Tayson turli televizion shou va filmlarda (ko‘pincha epizodik rollarda) ko‘rinish bera boshladi, shuningdek, o‘z hayoti haqidagi biografik filmlarda suratga tushdi. U butun dunyo bo‘ylab “Mayk Tayson: Inkor etib bo‘lmas haqiqat” nomli shou bilan gastrol qilgan. Bungacha, 2013-yilda shu nomdagi biografik kitobi chiqqan bo‘lib, u New York Times bestsellerlari ro‘yxatiga kirgan. Boks afsonasi ushbu sahna shousida tomoshabinlar bilan o‘z hayotidagi ilgari noma’lum va hayratlanarli voqealarni bo‘lishgan.
2017-yilda Tayson “Temir ambitsiyalar” nomli ikkinchi kitobini nashr etdi. Unda u murabbiyi va asrab olgan otasi Kas D’Amato bilan bo‘lgan ishlari haqida batafsil hikoya qiladi.
Mayk Taysonga tegishli “Hotboxin bilan Mayk Tayson” nomli podkasti ham mavjud. U yerda mashhur sportchilar mehmon bo‘ladi. Eng mashhur epizod — UFC sharhlovchisi Jo Rogan ishtirokidagi chiqish bo‘lib, u 11 million tomosha to‘plagan.
2018-yildan beri Mayk Taysonga tegishli kompaniya faoliyat yuritadi. Uning brendi — Tyson Holistic Holdings — turli mahsulotlar ishlab chiqaradi: shirinliklar, saqichlar, oziq-ovqat mahsulotlari, gazlangan ichimliklar.
Bokschi ikki marta ajrashgan, sakkiz nafar farzandi bor. Ulardan bir qizi bolaligida baxtsiz hodisa tufayli vafot etgan. Hozirda u uchinchi rafiqasi Lakiya Spayser bilan yashamoqda.
Izoh (0)