Toshkent shahar Yunusobod tumanining Asomov ko‘chasi (KHAY)dagi yo‘lning bir yo‘lagi 10-apreldan 6-maygacha yopiladi. Bu haqda Veolia Energy Tashkent xabar berdi.
Maʼlum qilinishicha, bunga yo‘lda umumiy uzunligi 560 metr, diametri 800 mm bo‘lgan eskirgan issiqlik quvurlarini almashtirish ishlari olib borilishi sabab bo‘ladi.
Shuningdek, Chilonzor tumani, Lutfiy ko‘chasi chorrahasidan Cho‘pon ota chorrahasigacha bo‘lgan KHAY yo‘nalishida joylashgan yo‘l 10-apreldan 22-aprelgacha yopiladi.
Ushbu hududda diametri 400 mm bo‘lgan, umumiy uzunligi 782 metrni tashkil etuvchi eskirgan issiqlik quvurlarini almashtirish ishlari olib boriladi.
“Yo‘l marshrutini rejalashtirayotganda bunga eʼtiborga olishingizni so‘raymiz”, deyiladi xabarda.
