La Liganing 30-turida “Real Madrid” o‘z maydonida “Valensiya”ga 1:2 hisobida mag‘lub bo‘ldi. Uchrashuvning 13-daqiqasida “qirollik klubi” hujumchisi Vinisius Junior penaltini aniq amalga oshira olmadi — uning zarbasini “Valensiya” darvozaboni Georgiy Mamardashvili qaytardi.
Bu mavsum hakamlar “Real” foydasiga 16 marta penalti belgiladi. Ammo madridliklar ulardan 11 martasidan aniq foydalangan bo‘lib, 5 bora noaniq zarba yo‘llagan. Bu natija klub uchun 2013/14-yilgi mavsumdan buyon eng yomon ko‘rsatkich bo‘lib turibdi. O‘sha mavsumda madridliklar La Ligani uchinchi o‘rinda yakunlagan, biroq Ispaniya Kubogi va Chempionlar Ligasini qo‘lga kiritgan edi.
Ayni paytda “Real Madrid” La Liga turnir jadvalida 63 ochko bilan ikkinchi o‘rinda bormoqda. Birinchi o‘rindagi “Barselona” hisobida 67 ochko mavjud.
