Germaniya Iqtisodiyot va iqlimni muhofaza qilish vazirligi Ukraina energetikasini qo‘llab-quvvatlash jamg‘armasiga qo‘shimcha 7,27 million yevro ajratdi. Bu haqda vazirlik saytiga joylangan bayonotda ma’lum qilindi.
Germaniya Federativ Respublikasi Iqtisodiyot va iqlimni muhofaza qilish vazirligi Yevropa energetika hamjamiyati tasarrufiga Ukraina energetika infratuzilmasini tiklash uchun qo‘shimcha 7,27 million yevro taqdim etadi. Mablag‘lar 2022-yilda hamjamiyat doirasida tashkil etilgan Ukraina energetikasini qo‘llab-quvvatlash xalqaro jamg‘armasiga o‘tkaziladi, deyiladi xabarda.
Ta’kidlanishicha, Germaniya jamg‘arma faoliyatiga eng katta moliyaviy hissa qo‘shmoqda. U 2022-yildan buyon jamg‘armaga 390 million yevrodan ortiq mablag‘ o‘tkazgan.
Vazir Robert Xabekning aytishicha, Germaniya ukrainaliklarni qat’iyat bilan qo‘llab-quvvatlashda davom etadi.
“Rossiyaning Ukraina fuqarolik va energetika infratuzilmasiga qarshi hujumlari hamon to‘xtovsiz davom etmoqda. Bu hujumlar Ukraina tinch aholisiga jiddiy zarar yetkazmoqda. Germaniya davom etayotgan favqulodda vaziyatga javoban Energetika hamjamiyatining Ukraina energetikasini qo‘llab-quvvatlash jamg‘armasiga yana bir bor hissa qo‘shmoqda. Beqaror vaqtlarda biz ukrainalik hamkorlarimizni qat’iyat bilan qo‘llab-quvvatlashda davom etamiz”, deydi Robert Xabek.
