Toshkentda MAN rusumli yo‘lovchi tashuvchi avtobusi va Lacetti YTHga uchradi.
Poytaxt YHXB matbuot xizmatining xabar qilishicha, yo‘l-transport hodisasi 19-noyabr kuni soat 06:40 larda Chilonzor tumani Bunyodkor—Qatortol-2 ko‘chalari kesishgan chorrahada sodir bo‘lgan. Haydovchi 1979-yilda tug‘ilgan M.Sh. boshqaruvidagi Lacetti hamda 1997-yilda tug‘ilgan haydovchi Q.M. boshqaruvidagi MAN avtobusi to‘qnashgan.
Lacetti yo‘lovchisi 1958-yilda tug‘ilgan D.M. birinchi tibbiy yordam ko‘rsatish maqsadida shifoxonaga olib ketilgan. Mazkur holat yuzasidan Toshkent shahar IIBB YHXB mas’ul xodimlari tomonidan surishtiruv ishlari olib borilmoqda.
“Toshshahartransxizmat” matbuot xizmatining bildirishicha, Lacetti asosiy yo‘lda svetoforning yashil chirog‘ida harakatlanib kelayotgan avtobusga yo‘l bermasdan yo‘lga chiqib kelgan.
