Hindistonda kimyo zavodida 24-may kuni sodir bo‘lgan yong‘in oqibatida 8 nafar fuqaro halok bo‘ldi. Bu haqda Hindiston mahalliy nashrlariga tayanib, Al Jazeera manbasi xabar berdi.
Manbada aytilishicha, yong‘in Maharashtra shtatining Thana tumanidagi Amudan Chemical kompaniyasida sodir bo‘lgan. Zavod asosiy bo‘limlaridan birida avval kuchli portlash, undan so‘ng esa keng ko‘lamli yong‘in yuzaga kelgan.
Hodisa oqibatida 60 nafarga yaqin fuqaro jarohatlanib, shifoxonaga joylashtirilgan. Bemorlarda kuchli teri kuyishi, nafas yo‘llarining kimyoviy modda taʼsirida zaharlanishi holatlari kuzatilgan.
Politsiya zavod egalariga nisbatan qotillik, jumladan, zaharli moddalar bilan muomala qilishda xavfsizlik qoidalariga rioya qilmaslik bandlari bo‘yicha ayblov qo‘zg‘atgan. Zavod rahbarlari hibsga olingan.
Hozirgacha ikki jasadning shaxsi aniqlangan. Qolgan jasadlar og‘ir darajada kuyib halok bo‘lgani bois ularning shaxsini aniqlash qiyinlashgan.
“Biz qurbonlarning oila aʼzolaridan jasadlarni aniqlashga yordam beradigan DNK namunalarini taqdim etishlarini so‘radik”, — deyilgan viloyat tibbiyot birlashmasi bayonotida.
Mahalliy nashrlar yong‘inni keltirib chiqargan portlash to‘lqini nihoyatda kuchli bo‘lganini yozgan. Dombivli shahridagi zavod joylashgan hududda katta zarba to‘lqini yuzaga kelib, qo‘shni zavodlar hamda yaqin-atrofdagi aholi xonadonlariga shikast yetkazgan.
Qidiruv-qutqaruv guruhlari yong‘in joyida tekshiruvni davom ettirayotgani maʼlum qilingan. Baxtsiz hodisani yuzaga keltirgan sabab aniqlanmagan.
Izoh (0)