13-aprel kuni kechasi Urganchda O‘zbekiston bosh vazirining sobiq o‘rinbosari, jurnalist, yozuvchi, shoir va dramaturg Erkin Samandar 90 yoshida vafot etdi. Bu haqda Yozuvchilar uyushmasi xabar berdi.
Erkin Samandar (Samandarov) 1935-yil 22-mart kuni Xivada dunyoga kelgan. Xorazm pedagogika instituti o‘zbek tili va adabiyot fakultetini tamomlagan.
1956—1961-yillarda Xorazm viloyati radioeshittirish qo‘mitasi o‘zbek eshittirishlari tahririyati muharriri, 1990-yilda O‘zbekiston Kompartiyasi Xorazm viloyat qo‘mitasi masʼul xodimi, 1967—1969-yillarda O‘zbekiston televideniyesi “Yoshlik” studiyasi bosh muharriri, 1969—1975-yillarda televideniyening dasturlar direktori, 1975—1977-yillarda adabiy dramatik eshittirishlar bosh muharriri, 1961—1963-yillarda “Xorazm haqiqati” gazetasida bo‘lim mudiri, 1977—1990-yillarda bosh muharrir, 1990—1993-yillarda O‘zbekiston bosh vazirining o‘rinbosari lavozimida faoliyat yuritgan.
“Amu jilolari” nomli birinchi she’riy to‘plami 1966-yilda chop etilgan. Shundan so‘ng “Osmon to‘la nur, “Dunyoning yoshligi” (1970), “Vafo degan gavhar” (1975), “Sevgi fasllari” (1973), “Mening yigit vaqtim” (1979), “Qobul soatlari” (1980), “Sohildagi bolalar” (1982), “Saylanma” “Yurakka yo‘l” kabi qator kitoblari dunyo yuzini ko‘rdi.
Shuningdek, Erkin Samandar “Javohir” (1980), “Ajdodlar qilichi” (1985), “Bashorat” (1994), “Jaloliddin Manguberdi” (1999), “Arabmuhammad Bahodirxon” (2002), “Pahlavon Mahmud Piryorvaliy” (1995), “Suyanch” (1996), “Ming otlilar diyori” (2003) kabi qator tarixiy pyesalarni ham yozgan.
Erkin Samandar 1989-yilda O‘zbekistondagi xizmat ko‘rsatgan jurnalist, 2019-yilda esa “Do‘stlik” ordeni bilan mukofotlangan.
Fevral boshlarida O‘zbekistonning sobiq bosh vazir o‘rinbosari Valeriy Atayev 75 yoshida Moskvada vafot etgani to‘g‘risida xabar berilgandi.
Izoh (0)