Sirdaryoda otasidan qo‘rqayotgan bolakay nevrozga chalingani, unga mutasaddilar yordami kerakligi haqida xabarlar tarqalgandi. Prezident huzuridagi Ijtimoiy himoya milliy agentligi holatga munosabat bildirdi.
![](/static/2024/03/03/ota bola-IL5RL3sQ.jpg)
Unda ma’lum qilinishicha, agentlikning Sirdaryo viloyati boshqarmasi tomonidan holatni o‘rganish va nazoratga olish maqsadida ishchi guruh tashkil etildi. Ishchi guruh tarkibiga mahalla fuqarolar yig‘ini raisi, viloyat asab va ruhiy kasalliklar dispanseri psixiatrlari, viloyat bolalar ko‘p tarmoqli tibbiyot shifokorlari jalb etildi.
Dastlabki o‘rganish davomida aniqlanishicha, Sirdaryo tumani “Quyosh” MFYda yashovchi 2018-yilda tug‘ilgan R.A.ning ota-onasi u tug‘ilmasidan oldin ajrashib ketgan. Bola 2020-yilgacha onasining qaramog‘ida bo‘lgan. U turmushga chiqqanidan keyin bola vaqtincha bobosi va buvisining uyida yashagan.
Oradan 3 yil o‘tganidan so‘ng bola Sirdaryo tumani hokimining 2023-yil 15-iyundagi qarori bilan “Vasiylik va homiylik to‘g‘risida”gi qonuni 10-19-21-moddalari hamda “Quyosh” MFY tomonidan tuzilgan dalolatnomaga asoslangan holda tog‘asiga vasiylikka berilgan.
Sudning 2023-yil 25-iyundagi hukmiga asosan bola otasi bilan har oyda ikki marta uchrashishi belgilangan. Bolaning qonuniy vakillarining bildirishicha, MIB talabiga asosan 17-fevral kuni bola otasi bilan uchrashgan paytida ota 5 yil davomida farzandidan xabar olmagani sababli bola otasini tanimagan va mazasi bo‘lmay, tinmay yig‘lagan. Uni bir necha bor ovutishga harakat qilinsa ham foydasi bo‘lmagan. Shu sababli uchrashuv to‘xtatilib, bolaga javob berilgan. Ularning aytishicha, bola har safar otasi bilan uchrashganida ruhiyatida shu kabi o‘zgarishlar kuzatilgan.
O‘rganish davomida voyaga yetmagan shaxs psixiatr va nevropatolog ko‘rigidan o‘tkazilgan va uning ruhiy holati yaxshi ekani, atrofdagilar bilan muloqotga oson kirishayotgani aniqlandi. Ammo shifokorlarning xulosalariga ko‘ra unda situatsion nevroz, ya’ni otasi bilan uchrashgan vaqtida bolaning ruhiyatida salbiy o‘zgarishlar sodir bo‘lgani qayd etildi. Yuzaga kelgan holatning oldini olish maqsadida shifokorlar xulosasiga tayangan holda sud tomonidan ota va bolaning ko‘rishish ishini vaqtincha to‘xtatish taklifi bildirilgan.
Xabarda aytilishicha, vaziyat bola huquqlari bilan bog‘liq masala bo‘lgani sababli, uni himoya qilish Prezident huzuridagi Ijtimoiy himoya milliy agentligining Sirdaryo viloyat boshqarmasi tomonidan nazoratga olindi.