O‘zbekiston hukumati delegatsiyasining Chexiyaga rasmiy tashrifi doirasida ushbu mamlakat prezidenti Pyotr Pavel bilan ham uchrashuv o‘tkazildi. Bu haqda hukumat portali xabar berdi.
Qabulda dastlab, Chexiya prezidenti Pyotr Pavel Shavkat Mirziyoyevning mamlakatda olib borayotgan islohotlari va ochiq tashqi siyosatlarini olqishladi hamda O‘zbekiston prezidentiga samimiy salomini yetkazib qo‘yishni so‘radi. O‘z navbatida, bosh vazir Abdulla Aripov Chexiya prezidentiga Shavkat Mirziyoyevning ham salomi va ezgu tilaklarini yetkazdi.
Uchrashuvda savdo-iqtisodiy, energetika, transport, turizm, qishloq xo‘jaligi, madaniy-gumanitar, turizm, oliy taʼlim va ilmiy-tadqiqot muassasalari o‘rtasidagi hamkorlikni rivojlantirish istiqbollari ko‘rib chiqildi.
O‘zbekiston hukumati delegatsiyasining Chexiyaga rasmiy tashrifi doirasida ushbu mamlakatning “Shkoda”, “Omnipol”, “Kristal Bogemiya”, “Primako” va boshqa yetakchi firma va kompaniyalari vakillari bilan tegishli yo‘nalishlar bo‘yicha hamkorlik aloqalarini kengaytirishga qaratilgan ikki tomonlama uchrashuv va muzokaralar o‘tkazildi. Yuqori texnologiyali ishlab chiqarish jarayonlari bilan tanishish maqsadida bir qator korxonalarga tashrif buyurildi.
Chexiyaga tashrif yakunlari bo‘yicha umumiy qiymati 800 million yevrodan ziyod investitsiya bitimlari va savdo shartnomalari imzolandi.
Avvalroq rasmiy tashrif bilan Chexiyada bo‘lib turgan O‘zbekiston bosh vaziri Abdulla Aripov Straka akademiyasida Chexiya bosh vaziri Petr Fiala bilan uchrashuv o‘tkazgandi. Tomonlar ikkita L-410 samolyotini yetkazib berish bo‘yicha shartnoma tuzishga muvaffaq bo‘lgan, “O‘zbekiston havo yo‘llari” yaqinda ularni qabul qilib oldi.
Izoh (0)