Ayni paytda rasmiy tashrif bilan Chexiyada bo‘lib turgan O‘zbekiston bosh vaziri Abdulla Aripov Straka akademiyasida Chexiya bosh vaziri Petr Fiala bilan uchrashuv o‘tkazdi. Uchrashuv davomida Petr Fiala Chexiya O‘zbekistonning uran va misiga qiziqish bildirayotganini ma’lum qilgan. Bu haqida Ceskatelevize sayti xabar berdi.
IntelliNews ma’lumotlariga ko‘ra, o‘tgan yili O‘zbekiston uran qazib olish bo‘yicha jahonda beshinchi o‘rinni egalladi va yil davomida 3300 tonna uran qazib oldi.
Shuningdek, tomonlar O‘zbekistonga Chexiyada ishlab chiqarilgan tog‘-kon uskunalarini eksport qilish, transport, ta’lim va boshqa sohalardagi hamkorlikni rivojlantirish masalalarini muhokama qildilar.
“Bundan tashqari, chex kompaniyalari joriy yil boshida O‘zbekiston poytaxti Toshkentga uyushtirilgan tashrif chog‘ida Rossiya va Sovet Ittifoqidan qolgan harbiy texnika o‘rniga O‘zbekiston qurolli kuchlari uchun muqobil texnikalar taklif etuvchi ishonchli hamkor bo‘lishga qiziqish bildirgan edi”, — deyiladi xabarda.
“Bahordan beri ikkita L-410 samolyotini yetkazib berish bo‘yicha shartnoma tuzishga muvaffaq bo‘ldik, “O‘zbekiston havo yo‘llari” yaqinda ularni qabul qilib oldi.
Bundan tashqari, Škoda Transportation O‘zbekistonga poyezdlar, tramvaylar va metro to‘plamlarini yetkazib berish bo‘yicha tenderda qatnashmoqda. Biz ushbu kompaniyaning hududlar bo‘ylab tashuvlar uchun 34 ta poyezdlar tarkibini taklif qilayotganini juda qo‘llab-quvvatlaymiz”, — dedi Petr Fiala.
“Agar Škoda Transportation tenderda g‘olib chiqsa, bu Markaziy Osiyoning ushbu davlatida chex kompaniyasiga berilgan eng yirik shartnoma bo‘ladi”, — deyiladi Ceskatelevize sayti xabarida.
Izoh (0)