O‘zbekistonning Isroildagi elchisi Feruza Mahmudova mazkur mamlakatdagi missiyasini yakunlamoqda. Bu haqda “Dunyo” agentligi xabar berdi.

Qayd etilishicha, Isroil tashqi ishlar vaziri Eli Koen bilan uchrashuvda ikki tomonlama hamkorlikning joriy kun tartibi muhokama qilingan. Vazir Isroil tomoni O‘zbekiston bilan faol rivojlanib borayotgan hamkorlikni yuksak qadrlashini taʼkidlagan.

Mulqot yakunida Eli Koen Feruza Mahmudovaga O‘zbekistonning Isroildagi elchisi lavozimida amalga oshirgan yuksak faoliyati uchun minnatdorlik bildirib, kelgusidagi diplomatik faoliyatida muvaffaqiyatlar tilgan.

Feruza Mahmudova 2020-yilning 19-iyun kuni Senat tomonidan O‘zbekistonning Isroil davlatidagi favqulodda va muxtor elchisi lavozimiga tayinlangan edi. 

Feruza Mahmudova 1975-yilda Toshkent shahrida tug‘ilgan. 1996-yilda Jahon iqtisodiyoti va diplomatiya universitetining xalqaro munosabatlar fakultetini tamomlagan. 2009-yilda Tübingen universitetida gumanitar fanlar bo‘yicha magistr darajasini olgan.

1996—2006-yillarda u O‘zbekiston Tashqi ishlar vazirligi markaziy apparatida ishlagan, oliy darajadagi tashriflarni tashkil etishda ishtirok etgan. 2014—2018-yillarda esa O‘zbekiston prezidenti huzuridagi Strategik va mintaqalararo tadqiqotlar institutida, 2018—2020-yillarda Tashqi ishlar vazirligining ikki tomonlama hamkorlik bosh boshqarmasi boshlig‘i lavozimida faoliyat ko‘rsatgan.

Bir necha kun oldin Dilshod Axatov O‘zbekistonning Germaniyadagi elchisi etib tayinlangani to‘g‘risida xabar berilgandi.