Boks bo‘yicha Jahon chempionatining 10-may kungi bahslarida o‘zbekistonlik ikki nafar bokschi o‘z jangini o‘tkazdi.
-51 kg vazn toifasida O‘zbekiston sharafini himoya qilayotgan Hasanboy Do‘stmatov yaponiyalik Tomoya Suboiga qarshi jang qildi. Qiziqarli o‘tgan jangda Do‘stmatov 4:3 hisobida g‘alaba qozondi va yarim finalga yo‘l oldi.
Hasanboy ushbu bosqichga qadar marokashlik Said Mortaji, Meksika vakili Alberto Ximenes va kubalik Erislan Romeroni mag‘lub etgandi.
-57 kg vazn toifasida harakat qilayotgan Abdumalik Halokov esa Iordaniya vakili Ishish Yusuf bilan to‘qnash keldi. Unda o‘zbekistonlik bokschi 5:0 hisobidagi g‘alabani qo‘lga kiritdi.
Halokov avvalgi bosqichlarda gayanalik Kevin Alikok va avstraliyalik Charli Seniorni yenggandi.
