Toshkentdagi maktabda o‘quvchiga qo‘l ko‘targan o‘qituvchiga intizomiy chora ko‘rildi

Toshkentning Sergeli tumanidagi 300-sonli umumta’lim maktabi o‘qituvchisi hamda o‘quvchisi o‘rtasidagi tortishuv aks etgan videolavha ijtimoiy tarmoqlarda tarqalgandi. Toshkent shahar XTBB matbuot xizmati holat yuzasidan rasmiy ma’lumot berdi.

Ma’lum qilinishicha, mazkur holat yuzasidan Toshkent shahar xalq ta’limi bosh boshqarmasi Ishchi guruhi o‘rganish olib bordi. Unga ko‘ra, haqiqatan ham 19-noyabr kuni Sergeli tumanidagi 300-sonli ixtisoslashtirilgan davlat umumta’lim maktabida 9-“L” sinfida matematika darsida o‘qituvchi M.J o‘quvchi U.Y.ga telefondan foydalanib, mashg‘ulotga xalaqit bergani uchun tanbeh bergan.

O‘qituvchi bir necha bor ogohlantirishiga qaramay o‘qituvchiga nisbatan o‘quvchi hurmatsizlik qilgan. O‘qituvchi behurmat bo‘lgani uchun o‘quvchiga qo‘l ko‘targan.

Yuqoridagi holat bo‘yicha o‘qituvchiga nisbatan intizomiy chora ko‘rilgan. Shuningdek, maktabda navbatdan tashqari yig‘ilish o‘tkazilib, barcha ustozlarga bo‘lgan vaziyat haqida ma’lumot berildi va tushuntirish ishlari olib borilgan.

Dars vaqtida telefondan foydalanmaslik bo‘yicha “Ta’lim muasassalarida mobil telefondan foydalanish tartib qoidalari to‘g‘risi”dagi qarorda ko‘rsatilgan tartiblarni buzgan o‘quvchilar hamda ularning ota-onalari ishtirokida yig‘ilish o‘tkazilib, qaror bilan qayta tanishtirilgan.

Mavzuga doir: “Uydagilarga yetkazsangiz, battar bo‘ladi”. Toshkentdagi xususiy maktabda o‘quvchilar kaltaklab kelingani aytilmoqda (video)