“Qrim go‘zali — 2022” g‘olibasi “Chervona Kalina” qo‘shig‘ini ijro etgani uchun jarimaga tortildi, uning dugonasi 10 kunga qamaldi 

“Qrim go‘zali – 2022” Olga Valeyeva “Chervona Kalina” qo‘shig‘ini ijro etgani uchun sud tomonidan 40 ming rubl (696 dollar) jarimaga tortildi. Bu haqda “RIA Novosti” xabar bermoqda.

Valeyeva bilan birgalikda qo‘shiq kuylagan dugonasi esa 10 kunga hibsga olingan. Life nashrining aniqlik kiritishicha, Valeyevaning voyaga yetmagan farzandlari borligi sababli unga nisbatan unchalik og‘ir jazo berilmagan.

Ayollar ikki modda — Rossiya Federatsiyasi Qurolli Kuchlarini obro‘sizlantirish va ekstremistik tashkilotlar ramzlarini targ‘ib qilish bo‘yicha ma’muriy huquqbuzarlik sodir etganlikda aybdor deb topildi.

Qrim Ichki ishlar vazirligining Telegram-kanalida ayollar qo‘shiq kuylagani uchun uzr so‘rab chiqqan video paydo bo‘ldi.

Valeyeva va dugonasi “Chervona Kalina” qo‘shig‘ini uyi balkonida o‘tirib ijro etgan va tegishli videoni Instagram’ga joylashtirgan edi. Tarmoqda video ko‘pchilikning e’tiborini tortdi. Valeyevaning o‘zi qo‘shiq hech bir g‘arazli niyatsiz ijro etilganini aytdi.

Sentabr oyi o‘rtalarida Qrimda “Chervona Kalina” qo‘shig‘i ijro etilgan to‘yning olti nafar tashkilotchisi va mehmonlari javobgarlikka tortilgan edi: ularga jarima solingan, ayrimlari 15 kunga qamalgan. Avgust oyida yarimorolda Ukraina harbiylarini qo‘llab-quvvatlovchi tasvirlar bilan barda “Yovvoyi dala” qo‘shig‘iga klip suratga olgan DJ hibsga olingan; Qo‘shiqqa buyurtma bergan mehmon 50 ming rubl (870 dollar) jarimaga tortilgan.

“Chervona Kalina” qo‘shig‘i Rossiya bosqinidan keyin Ukrainaning timsollaridan biriga aylandi. Uni ko‘plab ukrainalik san’atkorlar, shuningdek, Pink Floyd guruhi ijro etdi. Rossiya davlat OAVlarining yozishicha, qo‘shiq “Ukraina millatchi guruhlari, jumladan, Rossiya Federatsiyasida taqiqlangan guruhlarning madhiyasi hisoblanadi”.