O‘zbekistonda o‘tkazilgan Mokkoji Korea festivali va K-pop konserti — suratlarda
O‘zbekiston va Koreya Respublikasi o‘rtasidagi diplomatik munosabatlar o‘rnatilganligining 30-yilligiga bag‘ishlab Toshkentda ilk marta 24—25-sentabr kunlari Mokkoji Korea Butunjahon Koreya madaniyati festivali o‘tkazildi.
2022-yilda oflayn tarzda tashkil etilgan tadbir mamlakatlari sifatida O‘zbekiston va Malayziya tanlandi. Qolgan barcha mamlakatlar festivalni onlayn tarzda kuzatib bordi.
Festival davomida muxlislar mashhur K-pop artistlari bilan muloqot qilish, Xallyu muxlislari esa ko‘rgazma va tadbirlarga bepul tashrif buyurish, koreys xalqi turmush tarzi va madaniyati bilan yaqindan tanishish imkoniga ega bo‘ldi. 2020 va 2021-yillarda pandemiya sababli Mokkoji Korea onlayn o‘tkazilgan bo‘lib, unda Myanma, Filippin, Qozog‘iston, Rossiya, Hindiston, Indoneziya mamlakatlari ishtirok etgan. “Mokkoji” (모꼬지) koreys tilidan tarjima qilganda “hamkorlikda uchrashuv, bazm tashkil qilish” ma’nosini bildiradi. “Xallyu” esa Janubiy Koreya zamonaviy madaniyatining butun dunyo bo‘ylab tarqalishini bildiradigan atama sanaladi.
Umuman, koreys madaniyati shinavandalari ushbu festival mobaynida– mashhur K-pop artistlar bilan Hi-Five fan-uchrashuvlar;– mashhur seriallarning kostyumlarini kiyib ko‘rish imkoniyati beriladigan Koreya doramalari ko‘rgazmasi;– vebtunlar (Janubiy Koreya raqamli komikslari) ko‘rgazmasi;– Koreya taomlarining degustatsiyasi;– Mokkoji-market;– raqs tanlovlarida ishtirok etishdi.
25-sentabr kuni bo‘lib o‘tgan yakuniy konsertda EXO guruhi qo‘shiqchisi, reper, aktyor va raqqos Kay, qo‘shiqchi Ailee, F.able guruhi ishtirok etishdi. Shuningdek Xallyu muxlislari uchun Koreya va O‘zbekiston madaniyatiga bag‘ishlangan “kichik muhokamalar” bo’lib o‘tdi. Aytish kerakki, K-pop konsertga chiptalar sotilmadi, balki festival saytida o‘ynaldi. G‘oliblar ariza bergan da’vogarlar orasidan tasodifiy tarzda tanlab aniqlandi. Birinchi o‘yin 17-avgust, keyingi o‘yinlar esa 31- avgust va 7-sentabrda bo‘lib o‘tdi. Chiptalarni 24 va 25-sentabr kunlari ko‘rgazma vaqtida o‘tkazilgan tanlovlarda ishtirok etib ham yutib olish mumkin edi.
Festival endilikda 12-noyabrda Malayziyaning Kuala-Lumpur shahrida davom etadi.
