Instagram: Dildora Niyozova san’atni tark etdi, “Chorsu”da pomidor sotayotgan Nargiz Zokirova, “Million” konsertiga borgan Yulduz Usmonova

Jahon va o‘zbek shou-biznesi vakillarining Instagram sahifalariga joylashtirilgan qiziqarli foto va videolarini e’tiboringizga havola etamiz.

Vayner Liil Xurramov Fransiyaning Kann shahridan kichik reportaj tayyorladi. Uning aytishicha, Kannda hech kim asabiylashmaydi, hamma xursand yuradi.

Ikkinchi marta onalik baxtiga sazovor bo‘lgan aktrisa Bahora Arslonova farzandiga iliq tilaklar yozib qoldirgan muxlislariga minnatdorlik bildirdi.

Zohirshoh Jo‘rayev Surxondaryodagi to‘ylardan birida keksa muxlisining raqsga tushayotgani aks etgan videoni sahifasiga joyladi.

Dilnoza Kubayeva akasini tug‘ilgan kuni bilan tabrikladi.

Bobur Yo‘ldoshev hamda Shahlo Zoirova yangi klipda suratga tushmoqda. Ijtimoiy tarmoqlarda e’lon qilingan qisqa videoda Bobur Yo‘ldoshevning naqadar mahoratli aktyor ekanini ko‘rish mumkin.

Shahlo Ahmedova Xivada tushgan suratini sahifasiga joyladi.

Ziyoda vodiy yo‘lida qurut va patir sotadigan muxlislari bilan diydorlashdi hamda ular bilan suhbatda bo‘ldi.

Taniqli xonanda Dildora Niyozova turmush o‘rtog‘ining xohishi bilan san’atdan butunlay ketganini e’lon qildi. Xonandaning turmush o‘rtog‘i biroz avval rafiqasining to‘ylarga boshqa chiqmasligini aytgan, Dildora Niyozova esa uning bu so‘zlarini inkor qilib, oldindan olib qo‘yilgan xizmatlarga borishini ma’lum qilgandi.

Halima Ibragimova Yulduz Usmonovaning retro qo‘shiqlardan iborat konsert dasturiga tayyorgarlik jarayonidan video tayyorladi. Videoda repetitsiyadan so‘ng Yulduz Usmonova “Million” kulgi jamoasining konsertiga ham kirib o‘tganini ko‘rish mumkin. “Oddiy dekoratsiya bilan uch-to‘rt kishi sahnaga chiqib konsert berib yotishibdi. Barakalla! Bolalar ishlayapti”, — deydi xonanda konsert haqida gapirib.

Aktrisa Durdona Qurbonova kelinlik libosida tushgan suratini kuzatuvchilari bilan bo‘lishdi.

“Qalpoq” hajviy ko‘rsatuvidagi Alfiya kampir obrazi bilan tomoshabinlarga yaxshi tanish aktrisa Barno Teshaboyeva yangi obraz ishtirokida vaynlar suratga olishni boshladi.

Marhum xonanda Oxunjon Madaliyev hayot bo‘lganida 21-may kuni 59 yoshga to‘lgan bo‘lardi. Qilichbek Madaliyev ushbu sana munosabati bilan otasini xotirladi.

Rossiyalik xonanda Nargiz Zokirova “Chorsu” bozorida pomidor va baqlajon sotayotgani aks etgan videoni sahifasiga joyladi.