O‘zbekistonda har yili 500 nafargacha nogironligi bo‘lgan yoshlarga subsidiya ajratiladi

“Nogironligi bo‘lgan shaxslarni har tomonlama qo‘llab-quvvatlash, ularning bandligiga ko‘maklashish hamda ijtimoiy faolligini yanada oshirishga oid qo‘shimcha chora-tadbirlar to‘g‘risida”gi prezident qarori qabul qilindi, deb xabar beradi Telegram’dagi “Huquqiy axborot” kanali.

Qarorga ko‘ra, 2022-yil 1-yanvardan Bandlikka ko‘maklashish davlat jamg‘armasi mablag‘lari hisobidan nogironligi bo‘lgan shaxslarni ishga qabul qilgan ish beruvchilarga har bir xodim uchun 6 oyda BHMning 1,5 baravarida (405 ming so‘m) subsidiya beriladi.

2022-yil 1-martdan:

• bolalikdan nogiron bo‘lgan shaxslar va I va II guruh nogironlari daromad solig‘i bo‘yicha imtiyoz mehnatga haq to‘lashning eng kam miqdorining 1,41 baravaridan 3 baravarigacha oshiriladi;
• 2024-yil 1-martgacha ish beruvchilarga nogironlar uchun to‘langan ijtimoiy soliq Davlat budjetidan to‘liq qaytarib beriladi.

Endilikda davlat buyurtmachilari nogironlar jamoat birlashmalari bilan ularning mahsulotlarini xarid qilish bo‘yicha to‘g‘ridan to‘g‘ri shartnomalar tuzishi mumkin. Yoshlarga oid davlat siyosatini qo‘llab-quvvatlash jamg‘armasi mablag‘lari hisobidan har yili 500 nafargacha nogiron yoshlarga quyidagilar uchun subsidiya ajratiladi:

• axborot texnologiyalari, kompyuterda dasturlash amaliyoti, umumta’lim fanlari va xorijiy tillarni o‘rgatish;
• tadbirkor yoki o‘zini o‘zi band qilgan shaxs sifatida davlat ro‘yxatidan o‘tganlarga asbob-uskuna va mehnat qurollarini xarid qilish uchun.

“El-yurt umidi” jamg‘armasi hisobidan 2022-yildan har yili tanlov asosida 20 nafargacha nogiron yoshlar xorijiy OTMda, onlayn kurslarda ta’lim olishi tashkil etiladi. Avvalroq O‘zbekistonda bolalarga nogironlikni pediatriya tibbiy-ijtimoiy ekspert komissiyalari belgilaydigan bo‘lgani, mamlakatda endi xonadon sotib olayotgan ehtiyojmand aholiga dastlabki badalning bir qismini qoplash uchun 32 million so‘m subsidiya to‘lanishi to‘g‘risida xabar berilgandi. Mavzuga doir:

• “Jamiyatda o‘z o‘rnimiz bo‘lishiga imkon beringlar” — O‘zbekistonda nogironligi bo‘lgan shaxslar bandligini ta’minlash masalasi dolzarbligicha qolmoqda
• “Hech kim nogironlikdan sug‘urtalanmagan”. Olim Abdulla Abduxalilov bilan ko‘zi ojizlar muammolari haqida suhbat