O‘zbekistonning 4 ta hududida 1–25-noyabr kunlari sinov tariqasida aholini ro‘yxatga olish tadbiri o‘tkaziladi. Bu haqda AOKAda Davlat statistika qo‘mitasi raisi o‘rinbosari Zohidjon Ziyayev, boshqarma boshlig‘i Qobil Berdiqulov, Kadrlar malakasini oshirish va statistik tadqiqotlar instituti direktori Bahodir G‘oyibnazarov ishtirokida o‘tkazilgan matbuot anjumanida ma’lum qilindi.
Foto: AOKA
Aholini ro‘yxatga olish bu — mamlakat aholisining muayyan vaqtdagi “fotosurati”ni olish imkonini beruvchi umumdavlat miqyosidagi keng ko‘lamli tadbir bo‘lib, aholi to‘g‘risidagi ishonchli axborot manbasi hisoblanadi.
Aholini ro‘yxatga olishda har bir fuqaroning ma’lumotlari muhim ahamiyatga ega bo‘lib, avvalo, aholining aniq soni, yoshi, jinsi, fuqaroligi, milliy tarkibi, oilaviy ahvoli, ma’lumoti, uy-joy bilan ta’minlanganlik darajasi, bandligi, daromad manbalari kabi ko‘rsatkichlar bo‘yicha batafsil ma’lumot to‘planadi.
Sinov tariqasida aholini ro‘yxatga olish tadbiri Andijon viloyatining Xo‘jaobod tumani, Toshkent viloyatining Yuqori Chirchiq tumani, Xorazm viloyatining Xiva shahri hamda Toshkent shahrining Yashnobod tumanida o‘tkazilishi belgilandi.
Qayd etilishicha, sinov tariqasida aholini ro‘yxatga olishdan maqsad — aholini ro‘yxatga olish uchun ishlab chiqilgan uslubiy qo‘llanmalar, so‘rovnoma shaklidagi savollar, tashkiliy ishlar, dasturiy ta’minot va texnologiyalarni sinovdan o‘tkazish.
Ta’kidlanishicha, sinov jarayonlarida aniqlangan barcha xato va kamchiliklarni bartaraf etish yuzasidan tegishli choralar ko‘riladi. Shuning uchun ham sinov tariqasida aholini ro‘yxatga olish ishlari asosiy tadbirdan kamida ikki yil oldin o‘tkaziladi.
Mazkur ishlar uchun jami 175 nafar (Xo‘jaobod tumanida 35 nafar, Yuqori Chirchiq tumanida 37 nafar, Xiva shahrida 22 nafar va Yashnobod tumanida 81 nafar) registratorlar statistika, kadastr, mahalla va uy-joy fondidan foydalanuvchi tashkilotlar xodimlari orasidan hududiy komissiyalar tomonidan tanlab olingan.
Tanlab olingan registratorlar 2021-yilning 28–30-aprel kunlari Davlat statistika qo‘mitasi mutaxassislari tomonidan maxsus dastur asosida o‘qitilib, tanlanma ravishda mahallalarga chiqqan holda ularning amaliy ko‘nikmalari oshirildi.
Hozirgi kunda 4 ta hudud bo‘yicha ishlab chiqilgan tashkiliy rejaga muvofiq, mahallalarda aholini ro‘yxatga olish jarayonlarini tashkil etish va nazorat qilishga mo‘ljallangan ro‘yxatga olish uchastkalari tashkil etilmoqda. Jami bo‘lib 100 ta, shundan, Xo‘jaobod tumanida 11 ta, Yuqori Chirchiq tumanida 13 ta, Xiva shahrida 7 ta va Yashnobod tumanida 19 ta ro‘yxatga olish uchastkalari tashkil etilmoqda.
Shuningdek, har 5 nafar ro‘yxatga oluvchi ishini nazorat qilib boruvchi instruktorlik uchastkalari tashkil etilmoqda. Bular, Xo‘jaobod tumanida 56 ta, Yuqori Chirchiq tumanida 68 ta, Xiva shahrida 36 ta va Yashnobod tumanida 94 tani tashkil etadi.
Mazkur uchastkalar uchun mahalliy hokimliklar tomonidan zarur vositalar bilan jihozlangan bino yoki xonalar ajratiladi.
