O‘zbekiston aholisi 2021-yilda plastik kartadan naqd pul yechib olishni oshirdi

O‘zbekiston aholisi 2021-yilning yanvar–avgust oylarida naqd pul yechib olishni oshirdi. Bu haqda Markaziy bank naqd pul muomalasi bo‘yicha qisqacha sharhida ma’lum qildi.

Qayd etilishicha, bu vaqt davomida banklar orqali naqd pul aylanmasi hajmi 317,4 trillion so‘mni tashkil etgan. Bu 2020-yilning mos davriga nisbatan 48,8 foizga ko‘p. Jumladan, banklar kassalariga naqd pul tushumlari 157,6 trillion so‘mni, chiqim qilingan naqd pullar esa 159,9 trillion so‘mni tashkil etgan.

Yanvar–avgust oylarida bank kartalariga 178,1 trillion so‘mlik mablag‘lar kelib tushib, ushbu davrda bank kartalaridagi 58,8 trillion so‘mlik (33 foiz) mablag‘lar aholi tomonidan naqdlashtirib olingan.

Bank kassalaridan (shu jumladan, bankomatlardan) berilgan naqd pullar 2020-yilning yanvar–avgust oylariga nisbatan 50,8 trillion so‘mga oshishi kuzatilgan bo‘lsa, ushbu o‘sishning asosiy qismi bank kartalaridan naqd pul yechish hajmi 21,4 trillion so‘mga hamda banklar tomonidan aholidan naqd chet el valyutasini sotib olish uchun 16,6 trillion so‘m oshishi hisobiga yuzaga keldi.

Mavzuga doir: O‘zbekiston aholisi 2020-yilda 60 trln so‘mdan ortiq mablag‘ni naqdlashtirgan